﻿SALMOS.
36.
Da' ẕinnj da' žon bennen' ẕzoe' Dios cheḻa'ale ẕcháḻjḻenen ḻe' ḻo yichj ḻáẕda'we'. Bi ẕdan ḻáže'kze' gape' Dios ba la'ne. 
Che ḻen ẕḻoe'el kwine' ka to benne' ẕente. Žekle' bi ẕḻe'el Dios da' ẕinnj da' žone', na' bi ẕže'e ḻe'. 
Da' ẕchaḻjze' naken da' ẕinnj, na' da' wen ḻaže'. Biž žejni'ile' binlo, na' biž žone' da' chawe'. 
Ẕlab ḻaže'e da' bi nak chawe' katen' die' gan ẕtase'. Yoe'e nez da' bi naken chawe'. Bi žénele' wsane' žone' da' ẕinnj. 
X̱ana' Dios, ẕente nak yeḻa' žeyache' ḻaže' chio' dan' ẕžinten ẕan ya'abá. Yeḻa' ḻi ḻaže' chio' ẕžinten ḻo bejw. 
Da' chawe' da' nako' naken ka to ya'a ẕen chio', na' ka ẕchi'a ḻažo'o naken ka to nisdo' zil-ḻe'e. X̱ana' Dios, ẕwíakzo' benách ka', na' bia yix̱e' ka'. 
Ẕenḻe'e nak yeḻa' žeyache' ḻaže' chio', Dios. Che ḻen žx̱en ḻáže'gak benne' ka' Le' ka žongak bríse'do' ka' ẕkache' kwíngakba' ẕan x̱il ẕkoko'. 
Yéljgekle' ḻen da' deḻe'e ližo' na' Le' wye'jo' ḻégake' da' naken ka to yegw da' yožen nis dẕi'. 
Gan zo' Le' zoa gan žaḻ nis dan' žonnen yeḻa' nban. Ḻo yeḻa' baní' chio' ẕḻe'elto' da' nak baní'. 
Beyache' ḻaže'l benne' ka' zej nónbi'e Le', na' bzoa chegak benne' ḻi ḻaže' ka' da' nak chawe'. 
Bi go'o latje benne' ẕka'n ẕen kwine' tíḻ-ḻene' neda', na' bi wchíx̱ benne' wen da' ẕinnj neda'. 
Chejchégwgak benne' ka' žóngake' da' ẕinnj. Le' beno' ga bejchégwgak benne' ka', na' bi gak yeyásgake'. 
