﻿SALMOS.
38.
X̱ana' Dios, bi tiḻo' neda' ḻo yeḻa' ẕža'a chio'. Bi wsako'o neda' ḻo yeḻa' snia chio', 
dan' yag ntóche'do' chio' ka' wyázgaken neda', na' ḻen no'o bsaka' zi'o neda'. 
Bi zoa chawe' beḻa' žen chia' dan' ẕžo'o neda', na' žit yoa'a bi zej zoan chawe' dan' bena' doḻa'. 
Da' ẕinnj ka' da' bena' ẕbága'gaken yichj ḻáẕda'wa'. Zej naken chia' ka to ywa' zí'iḻe'e. 
Žia we' dot da' naka', na' ẕlaḻe'en, na' nóžwgak we' chia' ka'. Žaken chia' ki dan' bena' da' ẕinnj. 
Ẕda' ẕwia' ḻo yole, dan' žedoe'ela', na' ẕbeže nyacha'a dot ža, na' yele, 
dan' dot da' naka' ẕláḻe'en, na' bi zoa chawe' beḻa' žen chia'. 
Nat ni'a na'a, na' žekla' zej nžoẕjen žit yoa'a. Ẕbeže ḻaža'a dan' že' zedle yichj ḻáẕda'wa'. 
X̱ana' Dios, da' ẕdan ḻaža'a zóaḻenen Le', na' da' ẕbeže ḻaža'a ẕḻé'ekzlo' Le'. 
Žat ḻáẕda'wa', na' ba bedó ḻaža'a, na' biž ẕḻe'ela' chawe'. 
Žebíga'gak lježa' ka' zíto'le ni'a che yižwé' chia', na' benne' ẕjo'o ḻi'a chia' ka' ba bkwásgake'. 
Benne' ka' žénegekle' gótgake' neda' ẕzáḻa'gake' do yeḻj nich senen neda', na' benne' ka' žénegekle' góngake' neda' ẕia ẕnnégake' chia', na' ẕnnágake' kwia yi'a, na' zóatezegake' wsáka'gake' neda', 
san neda' bi ženla', kan žak che to benne' kwežw, na' naka' ka to benne' bi žak nne', benne' bi žsaljwe' žoe'e. 
Naka' ka to benne' bi be ženle', bennen' bi žechebe', 
dan' žx̱en ḻaža'a Le', X̱ana' Dios. Le' yechebo' ḻo wlaza' neda'. 
Bi go'o latje yebégekle' ni'a che da' žaken chia'. Kate' chejchegwa', bi go'o ḻégake' latje wká'n ẕen kwíngake' dan' žak nyache' ḻaža'a, 
san za' chejchegwa', na' ẕláteze dot da' naka'. 
Che ḻen yex̱óalapa' da' bi nak chawe' da' bena', na' gak nyache' ḻaža'a ni'a che doḻa' da' nbaga'a. 
Benne' ka' bi ẕḻé'egekle' neda' chawe' zej zoakze' chawe', na' zej nake' waḻe. Zej nyanḻe'e benne' ka' bi ẕḻé'egekle' neda' chawe', na' bi be ẕia bena' ḻégake'. 
Benne' ka' žóngake' benne' chawe' ka' ẕia. Zej nake' benne' ka' bi ẕḻé'egekle' neda' chawe' dan' žónteza' da' naken chawe'. 
Bi kwej yichjo' neda', X̱ana' Dios. Dios chia', bi so' zi'to' gan zoa'. 
Ben byene gákḻeno' neda', X̱ana' Dios. Nakkzo' Le' Benne' Weslá chia'. 
