﻿SALMOS.
40.
Ḻo yeḻa' ẕen ḻaže' chia' wleza' X̱ana' Dios, na' bze nage' chia', na' benle' da' wnnabla' Ḻe'. 
Bebeje' neda' ka to ḻo yežw gže', na' ḻo da' nak ka gona'. Bzoe' ni'a to ḻo yej x̱e, na' begoé'e neda' nez chawe'. 
Bene' ga žoḻa' to da' kob da' ẕka'n ẕenen X̱anžon'. Benne' zante ḻé'egekle' da' ni da' bene' Ḻe', na' žébegake' Ḻe', na' wx̱én ḻáže'gake' X̱anžo Dios. 
Ba nez ẕen naken che bennen' žx̱en ḻaže'e X̱anžo Dios, na' bi žónḻene' tẕen benne' ka' ẕží'igake' che Dios, na' kege ḻen benne' ka' ẕka'n ẕéngake' lo'a ka'. 
Da' ẕenḻe'e beno', X̱ana' Dios, na' žebanlto', na' ka zej nak da' žak ḻažo'o Le' gono' cheto', bi gak wlabto' ḻawo' Le'. Cha' wzenla' no benne' ka zej naken, na' cha' wchaḻja' chégaken, bi gak wlaba' ḻégaken. 
Bi chaz ḻažo'o biado' ka' gota' ḻawo' Le', cha' to da' gonna' chio'. Bi ẕnnabo' biado' ka' wzeya' ḻawo' Le', na' žen chegak biado' ka' da' ko'an ḻawo' Le' ni'a che doḻa' chia', san bsaljo' naga' nich yenla' chi'o. 
Naž wnnía': “Bwia nga, za'a neda'. Nyejw ḻe'e yiche la'y ka nak chia'. 
Žaz ḻaža'a gona' da' žak ḻažo'o Le', Dios chia', na' da' wnnakzo' Le' yo'on ḻo yichj ḻáẕda'wa'.” 
Ba bzenla' benne' ka' da' chawe' da' nako' gan zej ndobe benne' zante ka' ḻawo' Le'. Bwia nga, bi wzóa' žize, na' nnézkzelon' Le', X̱ana' Dios. 
Bi bkáche'za' da' chawe' da' nako' ḻo ḻáẕda'wa', san bchaḻjkza' ka nak yeḻa' ḻi ḻaže' chio', na' kan žesló' benne' ka'. Bi wzóa' žize ka nak yeḻa' žeyache' ḻaže' chio', na' ka nak da' naken dot da' li chio' ladjw benne' zante zej ndobe' chio' Le'. 
X̱ana' Dios, bi želo' yeyache' ḻáže'lo' neda'. Yeḻa' žeyache' ḻaže' chio', na' da' likze chio' žákḻentezegaken neda'. 
Nyéchjgekle da' bi nak chawe' ka' neda', na' da' bi nak chawe' ka' da' bena' zej žian neda'. Che ḻen bi gak chis ḻawa' ḻawo' Le'. Zej nyanžen ka zej nak yicha' yichja' na' žedó ḻaža'a. 
Ẕnnabla' Le', X̱ana' Dios, yesló' neda'. X̱ana' Dios, ben byene gákḻeno' neda'. 
Ben ga yedoé'egekle, na' chíx̱gekle benne' ka' žénegekle' gótgake' neda'. Ben ga wẕonnjgak, na' yedoé'egekle benne' ka' žak ḻáže'gake' góngake' neda' ẕia. 
Ben ga chíx̱gekle, na' wẕonnjgak benne' ka' ben dítjgekle' neda'. 
Ben ga yebégekle, na' soagak ḻo yeḻa' ba nez benne' ka' žx̱en ḻáže'gake' Le', na' nnégakkze benne' ka' zej nži'ile' Le', Benne' Weslá chégake'. Nnágake': “¡Ga'n ẕen X̱anžon'!” 
Ḻa'kze wsáka'gake' neda', na' gak nyache' ḻaža'a, bi gaḻ ḻažo'o Le' neda', X̱ana' Dios. Le' žákḻeno' neda', na' žesló' neda'. X̱ana' Dios. Bi želo' gákḻeno' neda'. 
