﻿SALMOS.
41.
Ba nez ẕen naken che bennen' že' ḻaže'e benne' yache' ka'. Bi ža zoe' ḻo da' zede, yeslá X̱anžon' ḻe'. 
X̱anžon' gape chi'ikze' ḻe', na' wneẕjwe' ḻe' yeḻa' nban. Gak to yeḻa' ba nez ẕen che bennen' ḻo yežlyó nga, na' bi wdé X̱anžon' ḻe' ḻo na'gak benne' ka' bi ẕḻé'egekle' ḻe' chawe'. 
X̱anžo Dios góx̱wkze' ḻe' kate' die' gan ẕzáka'ḻi'e. Yeyón chawe'e dot da' nake' katen' bi zoe' chawe'. 
Wnnía': “X̱ana' Dios, beyache' ḻaže'l neda'. Beyón be' da' nakkza' dan' bena' doḻa' kate' bži'a chio' Le'.” 
Benne' ka' bi ẕḻé'egekle' neda' chawe' ẕnnégake' chia', na' ẕnnábgake': “¿Batx̱ gat benne' ni, na' gak gaḻ ḻáže'to' ḻe'?” 
Žedjwíagake' neda', san kege nich gak chia' da' chawe'. Ẕbéjgake' neda' diža' nich gak nnégake' chia', na' kate' žežójgake', na' ẕzégake' dižan'. 
Kate' ẕdobgak benne' ka' bi ẕḻé'egekle' neda' chawe', na' ẕnnétezegake' chia'. Ẕcháḻjḻentezegake' ljéžgake' ka' chia' neda', na' ẕnnágake': 
“Ba de'e to yižwé' da' goten ḻe', na' biž yeyase' gan die'.” 
Ḻeska' bennen' bga'n chawe'e ḻen neda', bennen' bx̱en ḻaža'a, na' bdáwḻenkze' neda', benne' ni wnnekze' chia' neda' 
san Le', X̱ana' Dios, beyache' ḻaže'l neda', na' ben ga yeyasa', na' yebi'a chegak benne' ka' da' yeyáḻa'gake'. 
Kikze nnezla' žona' da' žaz ḻažo'o Le', na' bennen' bi ẕḻe'ele' neda' chawe' bi be gak gone' chia'. 
Le' nóx̱wkzo' neda' dan' naka' gaẕjw ḻaže', na' bzo' neda' ḻawo' Le' to chi'ize. 
¡Ga'n ẕen X̱anžon'! Nake' Dios chegak benne' Israel ka' yógo'te yiz nníta'gake', na' to chi'ize. Ka'kze naken, na' ka'kze gaken. 
