﻿SALMOS.
42.
Ka žon bžina' yix̱e' ẕbéžeya'aba' dan' ẕbiḻba', ka' ẕnnab be' da' nakkza' da' nak chio', Dios. 
Ẕbiḻe be' da' nakkza' dan' naken chio', Dios ban. ¿Batx̱ gak yida' nich ḻa'a ḻawo' Le', Dios? 
Nis da' ẕbeža' goken ka yet žawa' dot ža, na' yel, na' ẕnnábgekle' neda' yógo'te ža, na' ẕnnágake': “¿Ganẕkze Dios chio'?” 
Žezá' ḻaža'a da' ki, na' ẕbeže ḻaža'a. Žezá' ḻaža'a kan wyá'aḻena' benne' zan ka', na' wneẕwa' ḻáwgake' ḻo liž Dios, Beḻžo ḻo yeḻa' žebele, na' bka'n ẕenžo Dios ḻo lni. 
¿Biẕ chen' žat ni'a no'o, be' da' nakkza'? ¿Biẕ chen' že' zedlo' ḻo yichj ḻáẕda'wa'? Bx̱en ḻaže' Dios dan' wká'n ẕenkza' Ḻe' da' yoble. Nake' Benne' Weslá chia', na' Dios chia'. 
X̱ana' Dios, ba nat ni'a na' be' da' nakkza' ḻo yichj ḻáẕda'wa'. Che ḻen žezá' ḻaža'a chio' kate' ne zoa' ḻo yežlyó yecheḻa'ale yegw Jordán nga, ḻo ya'a Hermón gan že' Ya'a Misar. 
Ka nak žax̱to' da' žon nisdo', ka' žon to nis wbá'a chio', Dios. Ẕzaka' be' da' nakkza' dan' nis wbá'a dan' bselo'o ẕchen' neda'. 
Tža tža žeyache' ḻaže'l X̱anžon' neda', na' žel goḻkza' da' we ḻawa' Ḻe', na' wcháḻjḻena' Dios, Bennen' žonne' yeḻa' nban chia'. 
Yapa' Dios: “Le' žape chi'o neda'. ¿Biẕ chen' naḻ ḻažo'o neda'? ¿Biẕ chen' žak nyache' ḻaža'a dan' benne' bi ẕḻe'ele' neda' chawe' žsake'e neda'?” 
Žlagak žit yoa'a dan' benne' ka' bi ẕḻé'egekle' neda' chawe' žon dítjgekle' neda'. Tža tža ẕnnábgekle' neda', na' ẕnnagake': “¿Ganẕkze Dios chio'?” 
¿Biẕ chen' žat ni'a no'o, be' da' nakkza'? ¿Biẕ chen' že' zedlo' ḻo yichj ḻáẕda'wa'? Bx̱en ḻaže' Dios dan' wká'n ẕenkza' Le' da' yoble. Nake' Benne' žeslé' neda', na' Dios chia'. 
