﻿SALMOS.
44.
Dios, x̱a x̱na' gole cheto' ka' bzéngekle' neto' da' beno' ḻo ža chégake', dan' beno' yiz wdé ka'. 
Bchinnjo' yezika' yež ka' ḻawgak x̱a x̱na' gole cheto' ka', na' bnnito'o ḻégake' ḻo latje chegak benách ca'. Bsáka'ḻi'o benne' yež ka', san bzoa chocho' benne' chio' ka' ḻo yežlyó gan zoato' neto' na'a. 
X̱a x̱na' gole cheto' ka' bi wẕí'gake' yežlyó nga ḻen ya ntoche' chégakkze' ka'. Bi beslá kwíngake' ḻen yeḻa' waḻe da' zej nape', san Le' besló' ḻégake' ḻen yeḻa' wak chio', na' ḻen yeḻa' waḻe chio', na' ḻen yeḻa' ẕen chio', dan' wyáz ḻažo'o ḻégake'. 
Le', Dios, nako' Benne' Wnná Bia' chia'. Beslá neto', ẕa'só Jakob. 
Ḻen yeḻa' wak chio' Le' wzéx̱jwto' benne' ka' ẕdíḻ-ḻengake' neto'. Ni'a chio' Le' ẕzéx̱jwto' ḻégake'. 
Bi wx̱én ḻaža'a yag ntoche' chia', dan' bi yeslán neda'. 
Le' wdape chi'o neto' nich bi be gok gongak cheto' benne' ka' bi ẕḻé'egekle' neto' chawe'. Beno' ga bedoé'egekle benne' ka' ẕžá'agake' neto'. 
Ni'a chio' Le', Dios, sóatezto' ḻo yeḻa' ba nez, na' to chi'ize wx̱én ḻáže'to' Le', 
san wléj yichjo' neto', na' beno' ga žedoe'elto', na' bi žéjḻeno' benne' cheto' ka', benne' žjake' ḻo wdiḻe. 
Beno' ga bẕonnjto' ḻawgak benne' ka' ẕdíḻ-ḻengake' neto', na' benne' ka' ẕží'igake' cheto' beká'agake' yógo'te da' wdapto'. 
Bdio' neto' ka ẕila' ka' ḻo na'gak benne' ka' žótgake' neto', na' besḻaso' neto' ladjw benne' zi'to' ka'. 
Bdezo' neto', benne' chio' ka', ḻo ná'gake', na' bi be bezi'o. 
Beno' ga benne' yež gawze ka' ẕnnégake' cheto'. Benne' zej nyechjle' neto' ẕká'ngake' neto' ka'ze, na' žẕížegake' cheto'. 
Bzo' neto' ka to da' ẕnnagak benne' wláž cheto' ka' naken to da' nyáche'ḻe'e. Kate' ẕḻé'egekle benne' ka' neto', ẕta yíchjgake', na' žebángekle' ka žak nyache' ḻáže'to'. 
Tža tža žedoé'etezla', na' žé'teza' ḻo da' zedḻe'e. 
Ẕnnégake' chia', na' ẕzóagake' neda' cheḻa'ale. Benne' ka' bi ẕḻé'egekle' neda' chawe' ẕži'igake' chia', na' žóngake' neda' ẕia. 
Yógo'te da' ki žákgaken cheto', san bi na' gaḻ ḻáže'to' Le'. Bi na' wzoato' cheḻa'ale x̱tižo'o dan' bénḻeno' neto'. 
Bi na' wsán ḻáže'to' Le', na' bi na' wzoato' cheḻa'ale da' bchi'lo' neto'. 
¿Biẕ chen' bzo' neto' cheḻa'ale lo latj chegak bia snia ka', na' bzo' neto' gan za' gatto'? 
Chela' goḻ ḻáže'to' Dios cheto', o chela' bka'n ẕento' lo'a ka', 
¿bi žaḻa' ža'a Dios neto' ni'a che da' ki? Ḻe' nnézkzele' da' yo'o ḻo yichj ḻáẕdo'gak benne' ka'. 
Dan' nakto' chio', tža tža zóagake' gótgake' neto'. Béngake' neto' ka ẕila' za' gótgake'-ba'. 
¡Bebán, X̱anto' Dios! ¿Biẕ chen' ẕtaso'? ¡Bebán! ¡Bi so' zi'to' to chi'ize! 
¿Biẕ chen' bkache' kwino', na' bi žákbe'elo' kan ẕzáka'ḻe'eto', na' kan ẕkóngekle benne' ka' neto' žin? 
Ba nat ni'a na' be' da' nakkzto', dan' bzéx̱jwgake' neto', na' žx̱óbgake' neto' ḻo yo. 
¡Wzó ža'! ¡Gokḻen neto'! ¡Ḻo yeḻa' žeyache' ḻaže' chio', beslá neto'! 
