﻿SALMOS.
45.
Yo'o yichj ḻáẕda'wa' diža' x̱tanḻe'e ka', na' goḻkza' ka nak che benne' wnná bia'. Goḻkza' da' bzoj to benne' ẕcháḻjḻi'e chawe'. 
Nako' le' x̱tánle'eže ka yógo'te benne' ka'. Nak cheto' yeḻa' ba nez ni'a che da' ẕchaḻjo', dan' Dios ben cháwe'kze' le' to chi'ize. 
Bda' ya ntoche' chio' žoa'a ḻi'o, le', benne' waḻe, ḻo yeḻa' ẕen chio', na' ḻo yeḻa' wnná bia' chio'. 
Ḻo yeḻa' ẕen chio' zo' nbankzo'. Bkonle žin diža' li, na' yeḻa' gax̱jw ḻaže', na' da' chawe', na' wzejní'il kwino' da' ẕenḻe'e ka'. 
Zej nḻáḻe'egak yag ntóche'do' chio' ka', da' ka' gótgaken benne' yež ka' ḻawo' le', na' cházgaken ḻáẕdo'gak benne' ka' ẕžá'agake' le'. 
Gan ži'o, Dios, žen' to chi'ize, na' sóatezen. Chawe' nak ka ẕnna bi'o. 
Nži'ilo' da' nak chawe', na' bi ẕḻe'elo' chawe' da' bi nak chawe'. Che ḻen Dios chio' bzoe' le' latje chio', gan žebéḻe'eželo' ka lježo' ka'. 
Ẕḻa' ẕix̱ ẕa lano' ḻen da' ka' zej naken mirra, na' áloe, na' kasia, da' ka' ẕḻá'gaken ẕix̱. Ḻo ližo' da' záka'ḻe'en ẕzóagake' le' ḻo yeḻa' ba nez. 
Bi' no'le chegak benne' wnná bia' ka' zej zoabe' ladjw ẕo'lo' ka', no'le ka' zej nakže' blo. Kwito' ḻi ža že' bi' no'len' gakbe' ẕo'lo', bi' no'len' si'be' oro da' zan' zaka' yež Ofir. 
Bze nag, nó'ledo', na' bwia nga, na' benle da' nnia'. Žaḻa' gaḻ ḻažo'o lažo', na' liž x̱o', 
na' benne' wnná bian' dan ḻaže'e yeḻa' x̱tan chio'. Gok gax̱jw ḻaže' ḻawe' ḻe' dan' nake' ḻe' x̱ano', 
na' ḻa'gak no'le yež Tiro ka' ḻawo' le', zej noe'e da' gónngake' chio'. Nnabgak benne' wnni'a ka' to da' gono' chégake'. 
X̱tanle'e nak bi' no'le che benne' wnná bian' ḻo yo'o gan zoe'. Ẕa lánabe' nzin' da' x̱tan ka' da' zej naken oro. 
Wché'gake'-be' ḻaw benne' wnná bian', nákwbe' ẕa lánabe' dan' nwa'ḻe'en da' x̱tan ka'. X̱kwide' nó'ledo' ka' chjakbe' x̱kóže'lbe'. Nó'ledo' ki, no'le lježbe' ka', wché'gakbe' ḻebe' ḻaw benne' wnná bian'. 
Ḻo yeḻa' žebele, na' ḻo yeḻa' ba nez wché'gakbe' ḻebe', na' chó'ogakbe' ližo', benne' wnná bia'. 
Ḻo latje chegak x̱a x̱to'o ka' soagak ẕi'no' ka'. Gono' ga nna bia'gak x̱kwide' chio' ka' do ẕente yežlyó. 
Gona' ga chejsá' ḻáže'gak yógo'te benne' ka' lo'. Che ḻen wká'n ẕengak benne' ka' le' yógo'te yiz so', na' to chi'ize. 
