﻿SALMOS.
46.
Dios ẕḻe'ekzle' žo'o, na' žone' žo'o benne' waḻe ka'. Zóateze' gákḻene' žo'o kate' ẕzáka'žo. 
Che ḻen, bi žébežo ḻa'kze x̱o' yežlyó nga, na' chejchazgak ya'a ka' ḻo nisdo', 
na' ḻa'kze chasḻe'e nisdon', na' gonḻe'en žax̱to', na' ẕízegak ya'a ka' ni'a che da' žẕo'. 
De to yegw da' ẕnnen ḻo yeḻa' žebele ḻo yež che Dios, na' ḻo liž Dios, Bennen' nape' dot yeḻa' ẕen. 
Dios zoe' yežen', na' batkle kwia yin'. Yide' zildo' na' gákḻene' benne' wláž ka' che yežen'. 
Ẕbéžeya'agak benne' yežlyó nga, na' ẕžébegake' Dios, Benne' Wnná Bia' Ẕen. Ẕnne Dios kan ẕnne wzió', na' ẕbia yi' yežlyó. 
Dios, Bennen' nape' dot yeḻa' wak, zóaḻene' žo'o. Dios na' che Jakob ẕkache' chawe'e žo'o. 
Le da ḻé'elele da' ka' ben X̱anžon'. Le wia dan' bene' ḻo yežlyó dan' žonen ga žebanlžo. 
Ẕzoa žie' wdiḻe ka' žákgaken do ẕente yežlyó. Žichje' da' ka' ẕsegak yag ntóche'do' ka', na' ẕzoẕjwe' yag ntoche' ka' che wdiḻe, na' ẕzeye' karro ka' che wdiḻe. 
Ẕnna Dios: “Le soa žize, na' le nnezle naka' Dios. Napža' yeḻa' wak ka da' zej nape yógo'te yež ka'. Napža' yeḻa' wak ka da' zej nape benne' dot yežlyó.” 
Dios, Bennen' nape' dot yeḻa' wak, zóaḻene' žo'o. Dios na' che Jakob ẕkache' chawe'e žo'o. 
