﻿SALMOS.
47.
¡Le kapa' na'le, ḻe'e, yógo'te benne' ka'! ¡Le wká'n ẕen Dios ḻen yeḻa' žebele! 
Žaḻa' žébežo X̱anžon', Bennen' nape' dot yeḻa' wak. Nake' Benne' Wnná Bia' Ẕen, na' ẕnna bi'e dot yežlyó. 
Bdie' benne' zi'to' ka' ḻo na'žo. Bnnite'e žo'o nich nna bia'žo yež ka'. 
Beké'e yežlyó nga ḻo ná'gake', na' bennen' chežo, na' naken to yežlyó x̱tanḻe'e che ẕa'só Jakob ka', benne' ka' nži'ile'. 
Ẕben Dios gan ži'e ẕnna bi'e. Ẕbéžegak lozgak bia ka' kate' ẕben X̱anžon' ga na'. 
¡Le goḻ da' wká'n ẕenle Dios! ¡Le goḻ! ¡Le goḻ da' wká'n ẕenle Bennen' ẕnna bi'e žo'o! 
Dios nake' Benne' Wnná Bia' Ẕen dot ḻo yežlyó nga. ¡Le goḻ chie' ḻen dot yeḻa' žejní'il chele! 
Že' Dios gan ẕnna bi'e, ḻo latje la'y na'. Ẕnna bi'e yógo'te yež ka'. 
Ẕdobgak benne' ka' ẕnna biá'gake' yógo'te yež ka' tẕen ḻen benne' ka' che Dios che Bran. 
Benne' ka' ẕnna biá'gake' do ẕente yežlyó nga bdégake' yeḻa' wnná bia' chégake' ḻo na' Dios. Ḻe' ẕnna bi'e yógo'te benne' wnná bia' ka'. 
