﻿SALMOS.
48.
Ẕenḻe'e nak X̱anžon', na' žaḻa' wká'n ẕénḻe'ežo Ḻe' ḻo yež che Dios chežo, dan' žen' ḻaw ya'a la'y chie'. 
Sión, ya'a ẕen che Dios, naken sibe, na' x̱tanḻe'e. Naken yež che Benne' Wnná Bia' Ẕen, da' žonnen yeḻa' žebele chegak benách dot yežlyó nga. 
Dios bḻoe'ele' ḻaw ẕkache' chawe'e žo'o. Zoe' ḻo yo'o zaka' ka' che yež chien'. 
Bdobgak benne' wnná bia' ka', na' bḻá'gake' nich tíḻ-ḻengake' benne' yežen' ka', 
san kate' bḻé'egeklen', na' bebángekle'. Bžébegake', na' bẕónnjgake'. 
Wžé' zédḻe'egekle', na' wẕáka'ḻe'egake' ka žak che to no'le za' gaḻj bi' že'n chie'. 
Gókgake' ka barkw ka' žx̱íte'gaken kate' žakḻe'e be' ḻo nisdo'. 
Benlžo che da' ben Dios, na' na'a ba bḻe'elžon ḻo yež che X̱anžon', Bennen' nape' dot yeḻa' wak. Ḻe' wzóa chawe'e yež nga to chi'ize. 
Ga nak ḻo yodo' chio' Le', Dios, žezá' ḻáže'to' ka nak yeḻa' ži'i ḻaže' ẕen chio'. 
Gáte'teze ẕka'n ẕengak benách ka' Le', na' yeḻa' ẕen chio' ẕžinen do ẕente yežlyó. Ka ẕnna bi'o naken chawe'. 
Yebéḻe'egekle benne' ka' nníta'gake' yež Sión. Yebégekle benne' ka' nníta'gake' yež ka' che Judá dan' ẕchi'a ḻáže'kzo' ḻégake'. 
Ḻe'e, benne' ka' che Dios, le chechjle žoa'a yežen'. Le wláb yo'o sibe ka', da' ka' žape chí'igaken yežen'. 
Le wia nga ka nak ze'e ẕen da' nyechjlen yežen'. Le wia binlo ka zej nak yo'o waḻe ka' chen, nich wzénlele x̱kwide' chele ka' ka zej naken. 
Dios ni nakkze' Dios chežo to chi'ize. Ḻe' wḻoé'ekzle' žo'o nez chawe'. 
