﻿SALMOS.
49.
Le yenle da' ni, ḻe'e, benne' yógo'te yež ka'. Le wzé nag, ḻe'e, benne' dot yežlyó nga, 
ḻe'e, benne' blo ka', na' ḻe'e, benne' gax̱jw ka', ḻe'e, benne' wnni'a ka', na' ḻe'e, benne' yache' ka'. 
Wchaḻjkza' da' naken che yeḻa' žejní'il, na' wzejni'ila' ḻe'e da' yo'on yichj ḻáẕda'wa'. 
Bze nag diža' ki che yeḻa' žejní'il. Goḻkza' che to da' ngache', na' chinna' da' žóḻ-ḻena'. 
¿Biẕ chen' žon byenen žeba' ḻo ža che da' zede, kate' nyechjlen neda' da' ẕinnj da' žongak benne' ka' bi ẕḻé'egekle' neda' chawe'? 
Benne' ka' žx̱en ḻáže'gake' da' zej nake', na' ẕka'n ẕen kwíngake' dan' zej nape' yeḻa' wnni'a. 
Bi be gak góngake' da' yebéj chawen' ljéžgake' ka', na' bi gak wnéẕjwgake' to da' yeslán ḻégake', 
nich sóatezegake' nbángake' nich batkle nnitle beḻa' žen chégake' dan' ẕenḻe'e nak da' yeya'wn yeḻa' nban chegak benách, na' batkle gak no benne' chiẕjwen'. 
Ḻé'egekle' žatgak benne' žejní'igekle', na' žak chégake' tḻebe kan žak chegak benne' yaḻ ḻaže' ka', na' chegak benne' ḻaẕdo' zide ka', na' wká'ngake' yeḻa' wnni'a chégake' ḻo na'gak benne' yoble ka'. 
Ẕnna ḻáže'gake' sóatezegak ẕa'sógake' ka', na' ga'ngak lížgake' nich gákgaken chegak yógo'te kwe' ẕa'sógake' ka', na' ẕzóagake' la yežlyó chégake' kan légake', 
san bi gá'nteze benne' ka' ḻo yeḻa' ba nez. Zej nake' ka bia yix̱e' ka', bia ka' žátgakba'. 
Yógo'te da' žóngake' naken dáche'ze, na' wká'ngake' da' bx̱en ḻáže'gake'. 
Zej nake' ka to kwe' ẕila' ka' žjakba' ḻo yi' gabíl, gan gape chi'i yeḻa' got ḻégakba', na' benne' chawe' ka' nna biá'gake' benne' wnni'a ka' kate' za' cha'ní', na' kwia yi'gak da' ka' wdápgake', na' yi' gabíl naken gan nníta'tezegake'. 
Dios yeya'we' yeḻa' nban chia' ḻo yi' gabíl na' yechi'e neda' gan zoakze' Ḻe'. 
Bi kwe' zedlo' kate' no benne' ẕzí'ḻi'e yeḻa' wnni'a, na' kate' žone' liže' da' záka'ḻe'en. 
Kate' gate' bi be yechi'e, na' bi chejḻen yeḻa' wnni'a chien' ḻe'. 
Ḻa'kze x̱ak wzóe' nbane' gok chie' yeḻa' ba nez ẕen, na' bka'n ẕengak benne' ka' ḻe' katen' wzóe' nbane', 
san choe'e gan zej nnita' x̱a x̱ta'we' ka', na' batkle ḻe'ele' yeḻa' baní'. 
Žápegak benne' ka' ḻe' ba la'ne san bi žákbe'ele' nake' ka bia yix̱e' ka', bia ka' žátgakba'. 
