﻿SALMOS.
50.
Ẕnne X̱anžo Dios, na' ẕtobe' benne' dot yežlyó, benne' ka' žé'gake' gan ẕla' wbíž, na' gan ženen. 
Ḻo Ya'a Sión, da' naken x̱tanḻe'e ba bza'ní' Dios. 
Yeḻá' Dios chežo, na' bi soe' žize. Ẕenkze yi' ḻawe' Ḻe', na' gakḻe'e be' bdone' dan' chechjlen Ḻe'. 
Wtobe' benne' ka' nníta'gake' ya'abá na'le, na' benne' ka' nníta'gake' yežlyó nga, nich wchi'a ḻaže'e benne' chie' ka'. 
Ẕnne': “Le wtób benne' chia' ka', benne' ka' bénḻengake' neda' to diža', dan' bzoa chóchgake' ḻen žen chegak biado' ka'.” 
Da' zoan ya'abá ẕḻoe'e ḻawn nak Dios chawe', dan' nake' Benne' wchi'a ḻaže'e benách ka'. 
Ẕnne': “Le yenle, benne' chia' ka', na' wchaḻja'. Le wzé nag, benne' Israel ka', na' nnia' da' yesbaga'a ḻe'e ẕia. Neda', Dios, naka' Dios chele. 
Bi tiḻa' ḻe'e ni'a chegak biado' ka' betle ḻawa', na' ni'a chegak biado' ka' bzeyle, da' ka' ẕgó'otezele ḻawa' neda'. 
Bi si'a beždo ka' ḻo na'le ḻe'e, na' chibo byo ka', bia chele ka'. 
Yógo'te bia yix̱e' ka' zej nakba' chia', na' yógo'te bia beždo' ka', bia zej zoaba' ḻo ya'ado' ka'. 
Yógo'te bia ka' zoa x̱ílgakba' yó'ogakba' ḻo na'a, na' ḻezka' yógo'te bia ka' zej zoaba' nbángakba'. 
Cha' tona' neda', bi yapa' ḻe'e bi da' gonnle chia' dan' yežlyó, na' yógo'te da' zej den ḻawlen zej naken chia'. 
¿Žon byenen gawa' x̱péḻa'gak bež ka', cha' ye'ja' žen chegak chibo byo ka'?” 
Le ko'o ḻaw Dios da' wká'n ẕenle Ḻe', na' le wneẕjw da' wchebe ḻáže'le ḻaw Dios ẕente. 
Ḻezka' ẕnne': “Bḻiž neda' ḻo ža katen' gak da' wžía yin' benách ka', na' yeslá' le', na' le' gapo' neda' ba la'ne.” 
Dios ži'e no benne' wen da' ẕinnj: “¿Žeklo' ẕchaḻjo' le' kan nak da' wnnakza' neda', na' ẕnnio' che x̱tiža'a dan' bénḻena' benách chia' ka'? 
Le' bi ẕḻe'elo' neda' chawe' kate' ẕḻoe'ela' le' da' bi nak chawe' da' žono', na' ẕzo' cheḻa'ale diža' chia'. 
Kate' ẕḻe'elo' to benne' wbán, na' žono' ḻe' tẕen, na' nako' toze ḻen benne' ka', benne' ẕbej yíchjgake' neda'. 
Žónteze žono' da' ẕia, na' ẕcháḻjtezo' da' wen ḻaže'. 
Ẕnnétezo' che lježkzo', na' žesbago'o ẕia x̱kwide' che x̱na'kzo'. 
Beno' da' ki, san neda' wzóa' žize. Goklo' naka' neda' to benne' ka nako' le', san tiḻkza' le', na' wḻoe'ela' le' ka nak da' beno'. 
Le chejní'il da' ni na'a, ḻe'e žaḻ ḻáže'le Dios, nich bi wzóẕj Dios ḻe'e, na' biž soa no benne' yeslé' ḻe'e. 
Bennen' ko'e ḻawa' da' wká'n ẕene' neda' gape' neda' ba la'ne, na' bennen' ẕzoa choch kwine' nich gone' da' chawe', wḻoe'ela' ḻe' zoa' yeslá' ḻe', na' naka' Dios chie'.” 
