﻿SALMOS.
51.
Gokḻen neda', Dios, ḻo yeḻa' ži'i ḻaže' chio'. Ḻo yeḻa' žeyache' ḻaže' chio' beká'a ẕia da' nbaga'a. 
Wdíb neda' che da' bi nak chawe' da' bena'. Bka'n chawe' neda' che doḻa' da' nbaga'a. 
Žeyónbi'a bži'a chio' Le' ḻen dan' bena'. Doḻa' ka' bena' žesbága'gaken neda' ẕia. 
Ḻawo' Le' bena' doḻan'. O', ḻawo' Le'. Bena' da' bi naken chawe' ḻawo' Le'. Ki ẕnno' naken chia' nich gak bia' nako' chawe' ni'a che da' ẕnno'. Naken ḻi ḻaže' kan ẕchi'a ḻažo'o benách ka'. 
Bwia nga, bache nbága'kza' doḻa' katen' golja'. Ḻo doḻa' wzoakza' katen' bsan x̱na'a neda'. 
Žak ḻažo'o Le' soa da' likze ḻo yichj ḻáẕda'wa', na' ḻo yichj ḻáẕda'wa' bzo' yeḻa' žejní'il. 
Bka'n chawe' neda' ḻen da' ẕkonlo' žin, na' yega'na' chawe'. Wdíb neda', na' gakža' chiche ka nak bejw. 
Bzoa chia' yeḻa' žebele, na' yeḻa' ba nez, na' žit ka' da' yoa'a gá'ngaken choch, žit ka' bdichjo' Le'. 
Bi chejsá' ḻažo'o doḻa' ka' nbaga'a, na' beká'a yógo'te da' bi nak chawe' da' bena'. 
Dios, beyón chawe' yichj ḻáẕda'wa', na' bzoa to be' ḻi ḻaže' ḻo yichj ḻáẕda'wa'. 
Bi wkwaso' neda' ḻawo' Le', na' bi yekó'o be' la'y chio' ḻo yichj ḻáẕda'wa'. 
Bebí'i chia' yeḻa' žebele che yeḻa' weslá chio', na' bzoa choch be' chawe' dan' yoa'a. 
Naž wsedla' benne' wen da' ẕinnj ka' da' žaz ḻažo'o góngake', na' benne' doḻa' ka' yeyákgake' chio' Le'. 
Beslá neda' ḻo ẕia da' nbaga'a, beta' to benne'. Dios, nako' Benne' Weslá chia', na' goḻkza' che da' chawe' da' nako' Le'. 
X̱ana' Dios, bsaljw žoa'a, na' wzenla' benách ka' da' we ḻawa' Le'. 
Bi žaz ḻažo'o biado' ka' gota'-ba' ḻawo' Le', na' bi žaz ḻažo'o biado' ka' wzeya' ḻawo' Le'. 
Da' žaḻa' ko'ožo ḻaw Dios da' žaz ḻaže'e naken to ḻaẕdo' gax̱jw ḻaže'. To ḻaẕdo' gax̱jw ḻaže', na' da' žeyát ḻažen' bi wzó' cheḻa'ale, Dios. 
Ḻo yeḻa' ži'i ḻaže' chio', ben chawe' yež Sión. Beyón ze'e da' žape chi'in yež Jerusalén'. 
Naž chaz ḻažo'o biado' ka' gotto' ḻawo' Le' ḻo da' nak chawe', na' biado' ka' wzeyto' ḻawo' Le'. Naž gótgake' biado' ka' ḻo bkog la'y chio'. 
