﻿SALMOS.
55.
Bze nag, X̱ana' Dios, da' žḻiža' Le', na' bi wzó' cheḻa'ale da' ẕnnabla' Le'. 
Bebán ḻaže', na' bechebe chia'. Žḻiža' Le' ḻo da' ẕnnia', na' že' zedla'. 
Benne' bi ẕḻe'ele' neda' chawe' ẕnnie' chia', na' bennen' bi nake' chawe' žon ditjle' neda'. Žesbága'gake' neda' ẕia, na' ḻo yeḻa' ẕža'a chégake' ẕbia ḻáže'gake' neda'. 
Že' zedle ḻáẕda'wa' ḻo beḻa' žen chia', na' ẕchebe yeḻa' got neda'. 
Ẕžébeḻi'a, na' žẕízeḻi'a, na' žak chia' da' ẕcheben neda'. 
Wnnía': “Chela' gonno' chia' x̱il ka' ka zej nak x̱il bsia, tia' ḻo be'ze gan yezí' ḻaža'a. 
Da' ḻi wẕonnja' zíto'le, na' soakza' ḻe'e latje dach. 
Gon byena' bi be gon chia' be' bdone', na' be' waḻe.” 
Bžia yi' benne' ka' bi zej nake' chawe', X̱ana' Dios. Bchix̱ da' ẕnnágake', dan' ẕḻe'ela' da' ẕinnj, na' da' ẕia da' žóngake' ḻo yež nga. 
Dot ža, na' yele žéchjgekle' yež. Žóngake' da' ẕinnj, na' da' bi nak chawe' ḻo yež nga. 
Nža' yež nga da' bi nak chawe' da' žóngake'. Žóntezgake' da' wen ḻaže', na' da' ẕinnj ḻo nez chen. 
Chela' gok no benne' bi ẕḻe'ele' neda' chawe', bennen' bene' neda' ẕia, na' bzoelan'. Chela' gok benne' ẕže'e neda', bennen' bdíḻ-ḻene' neda' na' bkache' kwina' ḻawe' ḻe', 
san le' benkzon', na' goko' ka to bi' lježa'. Wẕí' ḻo no'o neda', na' goko' toze ḻen neda'. 
Tẕen bchaḻjžo dot ḻáže'žo, na' ḻo yeḻa' ži'i ḻaže' wdažo ḻo liž Dios. 
Dios, ben ga sen yeḻa' got benne' ka' choḻze, benne' ka' bi zej nake' chawe'. Ben ga chó'ogake' ḻo yi' gabíl kate' ne zóagake' nbángake'. Nža'gak lížgake' da' bi nak chawe' da' žóngake'. 
San ka nak chia' neda', bḻiža' Dios, na' X̱ana' Dios beslé' neda'. 
Zildo', na' wawbíž, na' kate' žen wbíž ẕcháḻjḻena' Dios. Žḻiža' Ḻe', na' Ḻe' ženle' chia'. 
Yeya'we' be' da' nakkza' ḻo na'gak benne' ka' ẕdíḻ-lengake' neda', na' gone' ga kweza' chawe', ḻa'kze zej nnita' benne' zante, benne' bi ẕḻé'egekle' neda' chawe'. 
Dios nake' Bennen' zóateze', na' ẕnna biá'teze'. Nake' chawe', na' wžía yi'e benne' ka'. Ki gone' chégake' dan' bi žsángake' da' žóngake', na' bi ẕžébegake' Dios. 
Benne' wen da' ẕinnj ka' ẕdíḻ-ḻengake' benne' ka' ẕgá'nḻengake' ḻégake' chawe'. Ẕží'igake' che diža' da' bénḻengake' benne' ka'. 
Da' ẕcháḻjgake' naken diža' cháwe'do', san yo'o yichj ḻáẕdo'gake' yeḻa' ẕža'a. Žóngake' x̱tanḻe'e diža' da' ẕcháḻjgake', san naken ka to ya ntoche'. 
Bde ywa' chio' x̱kože' X̱anžon' na' Ḻe' gon choche' le'. Batkle we'e latje chejchegw benne' chawen' to chi'ize. 
San Le', Dios, gono' ga cho'ogak benne' wen da' ẕinnj ka', na' benne' wet benách ka', na' benne' wen ḻaže' ka', ḻo yi' gabíl, kate' bi na' góngake' gachj yiz ka' da' yéla'gake', san neda' wx̱én ḻaža'a Le'. 
