﻿SALMOS.
56.
Beyache' ḻaže'l neda', Dios, nich bi wžía yí'gak benne' ka' neda'. Tža tža žsáka'gake' neda', na' ẕdíḻ-ḻengake' neda'. 
Dot ža, na' yele benne' ka' bi ẕḻé'egekle' neda' chawe' ẕbia ḻáže'gake' neda', dan' nníta'gak benne' zante, benne' ẕdíḻ-ḻengake' neda' ḻo yeḻa' ẕka'n ẕen kwíngake'. 
Kate' ẕžin ža ẕžeba', žx̱en ḻaža'a Dios. 
Žx̱en ḻaža'a Ḻe', na' ẕka'n ẕena' x̱tiže'e. Žx̱en ḻaža'a Ḻe', na' biž ẕžeba'. ¿Biẕkze gak gongak benne' ka' chia' neda'? 
Yógo'te ža ẕží'igake' che x̱tiža'a. Ḻen yógo'te da' ẕnnágake' žóngake' neda' žia. 
Ẕdóbgake', na' ẕkache' kwíngake'. Ẕwíagake' binlo da' žona'. Žénegekle' gótgake' neda'. 
X̱ana' Dios, bwia da' žóngake', na' ḻo yeḻa' ẕža'a chio' bžia yi' benne' ka'. 
Nnézkzelo' Le' ka žẕonnja' ḻawgak benne' ka'. Bejsá' ḻaže' nis da' ba wžeža'. ¿Bi zej nyejwn ḻe'e yiche chio'? 
Kate' žḻiža' Dios, ḻo ža na'kze žẕonnjgak benne' ka' bi ẕḻé'egekle' neda' chawe'. Nnezkzla' zoaḻen Dios neda'. 
Žx̱en ḻaža'a Dios, na' ẕka'n ẕena' x̱tiže'e. Žx̱en ḻaža'a X̱anžon', na' ẕka'n ẕena' x̱tiže'e. 
Žx̱en ḻaža'a Dios, na' biž ẕžeba'. ¿Biẕkze gak gongak benne' ka' chia' neda'? 
Nbaga'a da' bchebe ḻaža'a gona' chio', Dios. Goḻkza' da' we ḻawa' Le'. 
Besló' be' da' nakkza' ḻo yeḻa' got, na' bekó'o ni'a gan wzóa chejchégwgaken. Gak choa'a ḻawo' Le', Dios, ḻo yeḻa' baní' da' žonno' chegak benne' ka' zóagake' nbángake'. 
