﻿SALMOS.
57.
Beyache' ḻaže'l neda', Dios. Beyache' ḻaže'l neda', dan' žx̱en ḻaža'a Le' ḻen dot yichj ḻáẕda'wa'. Gape chi'o neda' ka žon ẕkoko' žape chi'iba' bríse'do' ka' ẕan x̱ilba', na' zejte te che da' žaken chia'. 
Wḻiža' Dios, Benne' ẕente. Wḻiža' Ḻe' nich gákḻene' neda'. 
Gan zoe' ya'abá chie' seḻe'e no benne' yeslé' neda' ḻo na' bennen' žénele' wžía yi'e neda'. Dios beyache' ḻáže'le' neda', na' benne' chia' da' li chie'. 
Že' zedla' ka to benne' ži'e ladjw bež yix̱e' ka'. Zoa' ladjw benne' ka' zej nake' ka bež yix̱e' ka', bia ka' žáwgakba' benách ka'. Da' ẕnnégake' chia' naken ka yag ntóche'do' ka', na' x̱tíža'gake' zej naken ka ya ntoche' ka'. 
¡Ga'n ẕen Le' ya'abá, Dios! ¡Yeḻa' ẕen chio' ẕžinen dot yežlyó! 
Ba bdix̱jgak benne' ka' do yeḻj nich séngake' neda', na' žedó ḻaža'a ḻo da' žaken chia'. Bché'ngake' to yežw nich chejchazan', san ḻégake' ba bejcházgaken'. 
Zoakze ḻáẕda'wa', Dios. Zoakze ḻáẕda'wa' nich goḻkza' da' wká'n ẕenen Le'. 
Bebán, be' da' nakkza', na' le yebán, ḻe'e žinnle da' ka' žóḻ-ḻenle. Zildo' yebankza'. 
X̱ana' Dios, wká'n ẕen Le' ladjw benne' chio' ka'. Goḻkza' chio' ḻawgak benne' yógo'te yež ka'. 
Nak yeḻa' žeyache' ḻaže' chio' ẕenže ka ya'abá, na' da' li chio' nakže ẕen ka bejw gasj ka'. 
¡Ga'n ẕenkzo' ya'abá, Dios! Yeḻa' ẕen chio' ẕžinen dot yežlyó. 
