﻿SALMOS.
58.
¿Ẕchaḻjle da' nak chawe', ḻe'e, benne' wnná bia' ka'? ¿Ẕchi'a ḻáže'le benne' chia' ka' ka nakkzen? 
O'o, san žezá' ḻáže'le da' ẕinnj da' gonle. Žonle ga že' zédḻe'egekle benne' ka' ḻo yežlyó chia'. 
Zej nchix̱e ḻáẕdo'gak benne' ka' nbej yíchjgake' neda' kate' bi na' gáḻjgake'. Bchíx̱gekle' kate' bi na' wsangak x̱ná'gake' ḻégake'. 
Da' ẕnnágake' žoten benne' ka' ka žon da' žia ẕan laye' beḻe snia. Zej nake' ka beḻe snia ka', bia kwežw ka'. 
Bi žéngeklba' chi'i benne' žone' yeḻa' wžá' nich kwé'gakba' žize ḻa'kze žoḻ-ḻi'e x̱tando'. 
Dios, wdíchj láye'gak benne' ka'. X̱ana' Dios, wdíchj láye'gak benne' ka' zej nake' ka bež yix̱e' ka'. 
Ben ga nnítgekle' ka nis da' ẕḻaljen ḻo yo. Ben ga bížgake' kan žak che yix̱e' da' nžogen ḻo nez, 
na' te chégake' kan žak che bia zag, bian' yeyóna'ba'. Ben ga biž ḻé'egekle' wbíž ka žak che to x̱kwide' žaljbe' ba natbe'. 
Néžwte kate' bi na' ḻa to yeso' ḻo yi' ẕen, yeká'a Dios benne' ka' to ḻo be' bdone', benne' ban ka', na' benne' gat ka'. 
Yebele benne' chawe' kate' ḻe'ele' yezí' wzón Dios benne' wen da' ẕinnj ka'. Wleje' žen chegak benne' ka' bebéj yíchjgake' Dios. 
Naž nna bennen': “Dekze laẕjw benne' chawe'. Dios ẕchi'a ḻáže'kze' benne' yežlyó ka'.” 
