﻿SALMOS.
59.
X̱ana' Dios, beslá neda' ḻo na'gak benne' ka' bi ẕḻé'egekle' neda' chawe'. Beslá neda' ḻo na'gak benne' ka' ẕdíḻ-ḻengake' neda'. 
Beslá neda' ḻo na'gak benne' ka' žóngake' da' ẕinnj. Beslá neda' ḻo na'gak benne' wet benách ka'. 
Žénegekle' gótgake' neda'. Zej ndobe benne' waḻe ka' nich tíḻ-ḻengake' neda', kege dan' nbaga'a ẕia, na' kege ni'a che da' ẕinnj da' bena' neda', X̱ana' Dios. 
Ḻa'kze bi be bena' chegak benne' ka', žon byéngake' góngake' neda' ẕia. Bebán, na' da ga zoa' ni, na' ḻe'elo' da' žóngake'. 
Le', X̱ana', Dios chegak benne' zan ka' žjake' ḻo wdiḻe, na' Dios chegak benne' Israel ka', bebán nich wsaka' zi'o benne' yógo'te yež ka'. Bi yeyache' ḻáže'lo' yógo'te benne' ka' ẕží'igake' chio' Le', na' žóngake' da' ẕinnj. 
Ẕḻá'gake' kate' žen wbíž, na ẕbéžeya'agake' ka žongak beko' ka', na' žéchjgekle' yež. 
Bwia nga, da' ẕcháḻjgake' naken ka da' žeyébgake'. Diža' ẕnnágake' zej naken ka ya ntoche' ka'. Ẕẕnnágake': “Bi zoa no benne' yenle' chežo.” 
San Le', X̱ana' Dios, wẕiẕo' chegak benne' ka'. Gon ditjlo' Le' benne' yógo'te yež ka'. 
Benne' ka' bi ẕḻé'egekle' neda' chawe' zej nake' waḻe. Neda' wx̱én ḻaža'a Le', dan' žape chi'o neda'. 
Dios, Bennen' žeyache' ḻáže'le' neda', yide', na' gákḻene' neda'. Dios gone' ga ḻe'ela' da' gak chegak benne' ka' bi ẕḻé'egekle' neda' chawe' kan žak ḻaža'a. 
Bi goto' benne' ka', nich bi gaḻ ḻáže'gak benne' chia' ka' da' ka' žono'. Besḻás benne' ka' ḻen yeḻa' wak chio', na' ben ga chejchégwgake'. X̱anto' Dios, Le' žape chi'ikzo' neto'. 
Ben ga chíx̱gekle' ḻo yeḻa' ẕka'n ẕen kwíngake', ni'a che doḻa' da' žóngake' ḻo da' ẕcháḻjgake', na' ni'a che diža' x̱iwe' ka', na' da' wen ḻaže' da' ẕnnágake'. 
Bžia yi' ḻégake' ḻo yeḻa' ẕža'a chio'. Bžia yi' ḻégake' nich biž nníta'gake'. Ben ga gákbe'egekle' Le' ẕnna bi'o ẕa'só Jakob ka'. Ẕnna bi'o dot yežlyó nga. 
Ẕḻá'gake' kate' žen wbíž, na' ẕbéžeya'agake' ka žongak beko' ka', na' žéchjgekle' yež. 
Ẕdágake' ka benne' ka' ẕdágakze', žíljgake' da' gáwgake'. Cha' bi žéljgeklen', dot yel žesbága'gake' ẕia toe' yetóe', 
san neda' goḻkza' che yeḻa' wak chio', na' zildo' wká'n ẕena' yeḻa' žeyache' ḻaže' chio', dan' gókḻeno' Le' neda', na' wdape chi'o neda' kate' wžé' zédḻe'ela'. 
Le' žon chocho' neda', na' goḻkza' chio', Dios. Žape chi'o neda', na' žeyache' ḻáže'lo' neda'. 
