﻿SALMOS.
60.
Dios, Le' bzo' neto' cheḻa'ale. Beno' ga bejchégwto', dan' bžá'aḻi'o neto'. Na'a, da gákḻeno' neto'. 
Beno' ga wẕó' yežlyó, na' beno' ga byaljwn. Da yeyonon' gan byaljwn, dan' ẕbia yin'. 
Beno' ga neto', benách chio' ka', wžé' zedlto'. Beno' ga gok cheto' ka we'jto' to da' benen ga bejchégwto'. 
Benn chegak benne' ka' ẕžébegake' Le' to da' gak bian', dan' wḻoé'e ḻawn da' nak dot da' li. 
Bze nag chia'. Beslá ḻégake' ḻen yeḻa' wak chio', nich lagak benne' ka' nži'ikzlo' Le'. 
Ḻo latje la'y chie' wnná Dios: “Yebekzla' neda'. Chisa' chele yežlyó chegak benne' Sikem ka'. Wžix̱a' chele yežlyó dan' žen' kwit yegw Sukot. 
Yežlyó Galaad naken chia', na' ḻezka' yežlyó chegak ẕa'só Manasés ka'. Yežlyó chegak ẕa'só Efraín ka' naken ka to x̱ḻapa' da' žape chi'in yichja'. Yežlyó chegak ẕa'só Judá ka' naken gan ẕnna bi'a, 
san yežlyó chegak benne' Moab ka' naken ka to ẕiga' ya da' yožen nis wná'a. Ḻo yežlyó chegak benne' Edom ka' cho'na' ẕela' gole ka'. Si'a ba nez yežlyó chegak benne' Filistea ka'.” 
¿Noẕkze wchi'e neda' nich tíḻ-ḻena' yež zoa to ze'e sibe dan' žape chi'in yežen'? ¿Noẕkze wchi'e neda' nich tíḻ-ḻena' benne' Edom ka'? 
¿Kege Le' wchi'o neda', Dios? Le' wléj yichjo' neto', na' bi wyéjḻeno' benne' cheto' ka' ḻo wdiḻe. 
Gokḻen neto' nich gak tíḻ-ḻento' benne' ka' ẕdíḻ-ḻengake' neto', dan' gak dáche'ze gákḻengak benne' ka' neto'. 
To ẕen ḻen Dios gonžo to da' ẕenḻe'e, na' Ḻe' wlage' benne' ka' ẕdíḻ-ḻengake' žo'o. 
