﻿SALMOS.
62.
Toze ḻen Dios ẕga'n chawe' be' da' nakkza'. Ḻekze' žeslé' neda'. 
Toze' Ḻe' žape chi'e neda', na' žeslé' neda'. Nake' Bennen' žox̱e' neda', na' bi chejchegwa'. 
¿To chi'ize wkwezle da' gonle chia' neda', yógo'tele žon byenle wžía yi'le neda'? Žonle ka žon to benne' ẕchinnje' to ze'e da' zoa bix̱en, o to ḻe'je da' nožon'. 
Žonle toze diža' kan yebejle neda' ḻo yeḻa' ẕen chia'. Nží'ilele da' wen ḻaže'. Ḻen žoá'ale ẕchaḻjle cháwe'do' san yo'o yichj ḻáẕdo'le da' ẕinnj da' gonle. 
Le', be' da' nakkza', wléz ḻaže' toze Dios. Nake' Ḻe' Bennen' žx̱en ḻaža'a. 
Toze' Ḻe' žape chi'e neda', na' žeslé' neda'. Nake' Bennen' žox̱e' neda', na' bi yedó ḻaža'a. 
Nak Dios Bennen' žeslé' neda', na' nake' yeḻa' ba nez chia'. Nak Dios Bennen' žape chi'e neda', na' Benne' žon choche' neda'. 
Le kwez ḻaže' Ḻe' to chi'ize, ḻe'e, benne' ka'. Bḻoe'el Ḻe' da' ẕdan ḻáže'le. Nak Dios Bennen' žon choche' žo'o. 
Da' ḻi, da' dáche'ze zej nak benne' ka', na' ka to da' wen ḻaže' zej nak benne' ẕen ka'. Bi náḻe'tekgekle' to ḻo ẕgons. Zej nakže' ža'ze ka to be' da' žeká'a ḻáže'žo. 
Bi wx̱én ḻáže'le da' gak gonle žakze chele. Bi wká'n ẕen kwinle ni'a che da' ka' ẕbanle. Cha' chan yeḻa' wnni'a chele, bi kwe'le wnné yoe chen. 
To chi'i wnné Dios, na' chope chi'i benla' da' ni. “Che Dios nak dot yeḻa' wak.” 
X̱ana' Dios, ḻo no'o za' yeḻa' žeyache' ḻaže' dan' žebi'o che to to benne' ka nakkze da' bene'. 
