﻿SALMOS.
63.
Dios, nako' Dios chia'. Ẕbiḻe be' da' nakkza' da' nak chio'. Beḻa' žen chia' ẕdan ḻaže' dan' naken chio'. Žak chia' ka zoakza' to yežlyó biž gan bi be nis den. Žak ḻaža'a yida' ḻawo' Le' nich ḻe'ela' yeḻa' wak chio', na' yeḻa' ẕen chio', káteze bḻe'ela' da' nak chio' ḻo latje la'y chio'. 
Nakže chawe' yeḻa' žeyache' ḻaže' chio' ka yeḻa' nban. Che ḻen wká'n ẕenkza' Le'. 
Wchaḻja' che da' chawe' da' nako' Le' x̱ak zoa' nbana'. Nich wká'n ẕena' La la'y chio' Le' wchiskza' na'a. 
Yelje be' da' nakkza' da' naken ka to yeḻa' waw dẕi'. Ḻen yeḻa' žebele wká'n ẕenkza' Le'. 
Žezá' ḻaža'a chio' Le' kate' dia' gan ẕtasa', na' ẕlab ḻaža'a ka nak chio' kate' bi na' tasa'. 
Dan' žákḻeno' neda', yebéḻe'ela' kwito' Le' kan žongak bríse'do' ka' ẕan x̱il ẕkoko'. 
Be' da' nakkza' naken toze ḻen Le', na' ḻen no'o waḻe nox̱o' neda', 
san benne' ka' gok ḻáže'gake' wžía yí'gake' neda' chejchó'ogake' ḻo yi' gabíl. 
Kwia yí'gake' ḻo ya ntoche'. Gákgake' da' gawgak beko' chjew ka'. 
Neda', benne' wnná bia', yebela' ḻo da' nak che Dios. No benne' ẕkonle' žin La Dios gape' Ḻe' ba la'ne, san benne' wen ḻaže' ka' gá'ngake' žize. 
