﻿SALMOS.
64.
X̱ana' Dios, bze nag chi'a. Že' zedla' žḻiža' Le'. Wdape chi'i yeḻa' nban chia' dan' ẕžeba' da' gongak benne' ka' ẕdíḻ-ḻengake' neda'. 
Bkache' chawe' neda' nich benne' ka' bi zej nake' chawe' bi góngake' chia' kan žénegekle', na' nich benne' ka' žóngake' da' ẕinnj bi góngake' chia' kan ẕza' ḻáže'gake'. 
Diža' ka' ẕcháḻjgake' zej naken ka ya ntoche' ka', na' ẕnnégake' chegak ljéžgake' ka' ka žon to benne' žsie' yag ntóche'do' chie' ka'. 
Ki ẕnnágake' bagáche'ze nich góngake' ga chejchégwgak benne' ḻi ḻaže' ka'. Choḻze žóngaken', na' bi be ẕžébegake'. 
Žon byéngake' góngake' da' ẕinnj da' žénegekle', na' ẕbékgake' do yeḻj ka' nich séngake' benne' ka'. Ẕnnágake': “¿Noẕ benne' ḻe'ele' da' žonžo?” 
Žíljgake' da' ẕinnj da' góngake', na' ẕwíagaken' binlo. Da' yo'o yichj ḻáẕdo'gake' naken da' kegle kan zej nak ḻáẕdo'gakkze'. 
San Dios gon zi'e benne' ka' ḻen yag ntóche'do' chie' ka'. Choḻze chó'ogake' yižwé' ẕen ka'. 
Da' bchaḻjgak benne' ka' gonen ga chejchégwgake'. Chébegak yógo'te benách kate' ḻé'egekle' ḻégake'. 
Naž chébegake', na' wcháḻjgake' che da' ben Dios, na' yeyónbia'gake' naken da' bene' Ḻe'. 
Yebele benne' chawe' ḻaw X̱anžon', na' wx̱én ḻaže'e Ḻe'. Gak yeḻa' ba nez ẕen chegak benne' ka' zej nake' ḻi ḻaže'. 
