﻿SALMOS.
65.
X̱ana' Dios, žaḻa' wx̱én ḻáže'to' Le' ḻo yež Sión, na' gonto' da' wchebe ḻáže'to' chio'. 
Le' ženkzlo' da' ẕcháḻjḻento' Le', na' ḻa'gak yógo'te benne' ka' ḻawo' Le'. 
Nbága'ḻi'a da' ẕinnj da' bena', san ženít ḻawo' Le' da' bži'ito' chio' Le'. 
Ba nez ẕen naken che bennen' ẕbio' Le', na' ẕnno' nake' chio', nich soakze' latje la'y chio'. Yeljkzto' da' chawe' da' de ližo', dan' den ḻo yodo' la'y chio'. 
Ḻo da' chawe' da' nako' gono' da' ẕenḻe'e kate' gono' da' ẕnnablto' Le', Dios, Benne' Weslá cheto'. Yógo'te benne' nníta'gake' yežlyó žx̱en ḻáže'gake' Le'. Ḻezka' žx̱en ḻáže'gak benne' ka' Le', benne' ka' ẕdégake' zíto'le ḻaw nisdo'. 
Le' ẕzoa chocho' ya'a ẕen ka' ḻen yeḻa' wak chio'. Nakkzo' Benne' waḻe. 
Ẕbek žio' nisdo' kate' ẕgo'nen, na' žaẕto' da' žonen. Ẕbek žio' benne' yež ka' kate' žóngake' žo'osbé. 
Che ḻen benne' ka' nníta'gake' dot yežlyó ẕžébegake' da' ẕenḻe'e da' žono'. Ẕnnito'o benne' ka' ḻo yeḻa' ba nez, benne' ka' nníta'gake' do ẕente yežlyó. 
Ẕwio' yežlyó, na' žseḻo'o nis yejw. Žono' ga žonnḻe'en linne chen. Bnnito'o yegw ka' ḻo yežlyó da' zej nža'ḻe'en nis. Ẕkwezo' ẕoa' za da' gawgak benne' ka', kan wnnakzo' gono'. 
Žseḻo'o nis yejw gan de na, na' žeyonon' yo ya'a. Žesbison' ḻen nis yejw na', na' žono' ga ẕgól-ḻe'egak da' zej nazen ga na'. 
Žono' ga gak chegak benne' ka' yeḻa' ba nez to yiz to yiz ni'a che da' ẕneẕjo', na' bejw gasj chio' ka' žónngaken yejw da' žonen ga ẕgolgak da' zej nazen. 
Žon yejw chio' ga žak ya'a gan ẕdagak bia yíx̱e' ka' na' žebégekle benne' ka' ẕḻé'egekle' žeyák ya'ado' ka' ya'a. 
Ḻo lache' ka' zej nnita' ẕila' ka', na' žoa'agak yégodo' ka' naz ẕoa' stribe. Ẕbéžya'agak benne' chio' ka' ḻo yeḻa' žebele, na' žóḻgakkze' chio' Le'. 
