﻿SALMOS.
66.
¡Le wká'n ẕen Dios ḻo yeḻa' žebele, ḻe'e zoale dot yežlyó! 
¡Le goḻ ka nak yeḻa' ẕen chie' Ḻe'! ¡Le wká'n ẕene' kate' we ḻawle Ḻe'! 
Le ye' Dios: “¡Žebáneḻe'elto' che da' beno' ḻe'!” Ni'a che yeḻa' ẕen che yeḻa' wak chio' benne' ka' bi ẕḻé'egekle' Le' chawe' žóngake' ka ẕnna x̱tižo'o. 
Benne' ka' nníta'gake' dot yežlyó we ḻáwgake' Le', na' góḻgake' chio' Le', na' che La la'y chio'. 
Le da, ḻé'elele da' ẕen ka' da' ben Dios, da' ẕenḻe'e da' bene' ni'a chegak benne' chie' ka'. 
Bene' ga beyák nisdo' yo biž, na' wdegak benne' chie' ka' ḻen ní'agakze' gan wzóa to yegw zil. Žoa'a nisdon' bebéḻe'egekle' ḻaw Dios. 
Ḻen yeḻa' wak chie' nna bi'e to chi'ize. Ẕwíakze' da' žongak benne' ka' yógo'te yež ka'. Benne' ka' ẕží'igake' chie' Ḻe' bi gata' yeḻa' ẕen chégake'. 
Ḻe'e, benne' ka', le wká'n ẕen Dios chežo. Le wzenle benne' ka' da' žoe ḻawle Ḻe'. 
Ḻekze' žape chi'e žo'o nich soažo nbanžo, na' bi bi'e latje chejchégwžo. 
Le', Dios, bwio' neto' ḻo da' ka' bento'. Bdio' neto' ḻo da' wẕáka'to' kan žongak benne' ka' ẕdégake' ya plat ḻo yi' nich ga'nen chawe'. 
Beno' ga bejchazto' to ḻo do yeḻj. Bdo'o x̱kóže'to' to ywa' zí'iḻe'e. 
Beno' ga wdegak benne' zej žie' bžina' chie' ka' ḻo yichjto'. Wdeto' da' naken ka to ḻo yi', na' to ḻo nis zil, na' bebejo' neto', na' bzo' neto' to latje gan zoato' ḻo yeḻa' ba nez. 
Cho'okza' ližo' nich wzeya' biado' ka' ḻawo' Le'. Gonna' chio' da' wchebe ḻaža'a gona'. 
Bchebe ḻaža'a gonan', dan' wnnía' katen' wžé' zédḻe'ela'. 
Wzeya' biado' ka', bia ženne' ka', ḻawo' Le', na' kwen žen chegak ẕíla'do' ka' wzeya'-ba' gan zo', na' gota' beždo' ka', na' chibo byo ka' ḻawo' Le'. 
Le da, yénlele, yógo'tele ḻe'e ẕžébele Dios. Wzenla' ḻe'e da' bene', gókḻene' neda'. 
Dot ḻaža'a bḻiža' Ḻe', na' bka'n ẕenkza' Ḻe'. 
Chela' wzé ḻaža'a to da' ẕinnj bi benle X̱anžon' chia', 
san da' likze benle Dios chi'a, na' bze nage' da' wnnabla' Le'. 
Bi bzoe' cheḻa'ale da' bcháḻjḻena' Ḻe', san beyache' ḻáže'le' neda'. ¡Ga'n ẕen Dios! 
