﻿SALMOS.
68.
Wzó ža', Dios. Besḻás benne' ka' bi ẕḻé'egekle' Le' chawe', na' wẕonnjgak benne' ka' ẕží'igake' chio'. 
Ka žon to be', ẕlagen žen che yi', ka' wlago' Le' benne' ka'. Kan želane china' bez ḻo yi', nítgekle benne' ka' bi zej nake' chawe' ḻaw Dios. 
Yebégekle benne' chawe' ka', na' sóagake' ḻo yeḻa' ba nez ḻawe' Ḻe'. X̱íte'gake' ḻo yeḻa' žebele chégake'. 
¡Le goḻ che Dios! ¡Le goḻ salmo ka' che La la'y chie'! ¡Le wká'n ẕen Bennen' ži'e ya'abá! Nzi' ḻe' Jah. ¡Le yebele ḻawe' Ḻe'! 
Žape chi'e bi' wzébedo' ka', na' ẕwíakze' no'le wzebe ka'. Zoakze Dios ḻo latje la'y chie'. 
Dios ẕnnite'e lježe benne' ka' bi zoa no ljéžgake'. Žebeje' benne' ka' zej yoe'e ḻo na'gak benne' zi'to' ka', nich sóagake' ḻo yeḻa' ba nez, san benne' ka' ẕží'igake' che Dios chejnníta'gake' to ḻo yežlyó biž. 
Dios, kate' wnežo' ḻawgak benne' chio' ka', na' wdío' ḻo yežlyó bižen', 
na' wẕó' yežlyón', na' gokḻe'e yejw ḻaw Dios. Ya'a Sinaí wẕizen ḻaw Dios chegak benne' Israel ka'. 
Bseḻo'o to nis yejw wáḻeḻe'e, Dios. Kate' bedó ḻáže'gak benne' chio' ka', na' Le' ben chocho' ḻégake'. 
Benne' ka' zej nake' chio' chejnníta'gake' yežlyó chio' to chi'ize. Ḻo da' nak chawe', Dios, žox̱o' benne' yache' ka'. 
X̱anžo Dios bseḻe'e to diža' chawe', na' bseḻe'e benne' zante, benne' bzéngekle' benách ka' diža' chawen'. 
¡Bẕónnjgake'! Bẕonnjgak benne' wnná bia' ka' ḻen benne' chégake' ka', benne' žjake' ḻo wdiḻe. No'le ka' bené'egekle' da' gota' chegak benne' ka'. 
Ḻa'kze bkache' kwinle gan žape chi'ile ẕila' ka', gákwle da' naken ka x̱il plomdo' ka' da' zej naken x̱tan, na' ya plat, na' doba' ka' chegak x̱ilba' ka' zej naken ya oro. 
Kate' Dios, Benne' ẕente, besḻase' benne' wnná bia' ka' ga na', na' bex̱jw bege' da' bgakwn Ya'a Salmón. 
To ya'a ẕen nak Ya'a Basán. To ya'a ẕenḻe'e nak Ya'a Basán na'. 
¿Biẕ chen' ẕwíale, ḻe'e, ya'a ẕen ka'? Ẕwíale ya'a na' gan žénele Dios soakze'. Da' likze soakze X̱anžon' ḻaw ya'a na' to chi'ize. 
Karro ka' che wdiḻe da' nape Dios zej nyanḻe'en. X̱anžo Dios zezé'e gan že' Ya'a Sinaí nich soe' latje la'y chie'. 
Beyepo' ya'abá, bechi'o benne' ka' bebejo' ḻo na' yeḻa' got. Wẕi'o da' chawe' ka' da' bnéẕjwgak benne' ka' chio' Le'. Ḻezka' benne' ka' bží'igake' chio' Le', gota' da' bénngake' chio' Le', Dios. 
¡Ga'n ẕen X̱anžon'! Tža tža žónnḻi'e da' chawe' chie' chežo. Nake' Dios, na' žeslé' žo'o. 
Dios, Bennen' nake' Dios chežo, beslé' žo'o. X̱anžo Dios na'kze beslé' žo'o ḻo na' yeḻa' got. 
Da' likze Dios gone' we' yichjgak benne' ka' ẕží'igake' chie' Ḻe'. Gone' we' yichjgak benne' ka' žónteze žóngake' doḻa'. 
Wnná X̱anžon': “Gona' ga yežinle lažle, yeza'le ḻaw Ya'a Basán. Gona' ga yeza'le že'l ḻo nisdo', na' yežinle lažle. 
Wlejle žen chegak benne' ka' ẕdíḻ-ḻengake' ḻe'e, na' beko' chele ka' ḻé'jgakban'.” 
Za'gak benne' chio' ka', na' žoe ḻáwgake' Le', Dios. Ḻo yeḻa' žebele chégake' žó'ogake' latje la'y chio'. 
Zejnéžwgak ḻawle benne' ka' žóḻgake'. Benne' ka' ẕkwéẕgake' da' ẕgóḻgake' zjake' ẕántele. Gachj ḻawle zjak x̱kwide' nó'ledo' ka' zej nóx̱o'be' da' ka' ẕgóḻgakbe'. 
¡Le wká'n ẕen Dios gan zej ndobe benách chie'! ¡Le wká'n ẕen X̱anžon', ḻe'e nakle ẕa'só Israel! 
Ḻezka' zjak ẕa'só Benjamín ka'. Zej nake' bábzegake' san ẕnna biá'gake'. Ḻezka' zjak benne' zan ẕa'só Judá, na' benne' zan ẕa'só Sabulón, na' benne' zan ẕa'só Neftalí. 
Dios, bḻoe'e ḻaw yeḻa' waḻe chio'. Ben choch, Dios, dan' beno' ni'a cheto'. 
Dan' nak ẕen yodo' chio' da' zoan ḻo yež Jerusalén, benne' blo ka' kó'ogake' da' zej nape' ḻawo' Le'. 
Bdiḻ-ḻen benne' ka' chegak yež zi'to' ka', benne' ka' ẕdíḻ-ḻengake' benne' chio' ka'. Zej nake' ka bež zan ka', ḻen ẕí'ngakba' ka', dan' ẕdíḻ-ḻengake' yež zan ka' nich kwéjgake' yeḻa' wnni'a chégake'. Besḻás benne' ka' žaz ḻáže'gake' chjake' ḻo wdiḻe. 
Ḻa'gak benne' wnná bia' ka' che yežlyó Egipto. Benne' ka' che yežlyó Etiopía gon byéngake' wká'n ẕéngake' Dios. 
¡Le goḻ che Dios, ḻe'e zoale dot yežlyó! ¡Le goḻ che X̱anžon'! 
¡Le goḻ che Bennen' ži'e ya'abá na'le, dan' wzóan zga'ale! Le wia nga, nnie' kan ẕnne wzió'. 
Le wia nga, nape Dios dot yeḻa' wak. Ḻo yeḻa' ẕen chie' ẕwíakze' benne' Israel ka', na' ẕan ya'abá nla' ḻaw yeḻa' waḻe chie'. 
Ẕžébeto' Le', Dios, gan zo' latje la'y chio'. Dios chegak benne' Israel ka', žon chochkzo' benne' chio' ka'. ¡Ga'n ẕen Dios! 
