﻿SALMOS.
69.
Dios chia', beslá neda'. Naka' ka to benne' žiepe' nis. 
Naka' ka to benne' yoe'e ḻo gona', na' bi žak se'e. Naken ka yoa'a ḻo nis zil-ḻe'e, na' nisen' za' wkachen' yichja'. 
Žejx̱áke'la' dan' scha wnnéḻi'a, na' da' lba'a. Žatgak yej ḻawa' x̱ak ẕbeza' nich gakḻen Dios neda'. 
Zej nyanže benne' ka' bi ẕḻé'egekle' neda' chawe' ka zej nyan yicha' yichja', na' bi be ẕia nbaga'a. Benne' ka' ẕžá'agake' neda' zej nákḻi'e waḻe. Benne' ka' žóngake' neda' ẕia, na' bi zoa biẕ chen'. Žon byéngake' yeyiẕjwa' da' bi wlana'. 
Dios, nnézkzelo' Le' bena' da' yaḻze, na' ẕḻe'ekzlo' doḻa' da' bena'. 
X̱ana' Dios ẕente, bi go'o latje benne' ka' žx̱en ḻáže'gake' Le' yedoé'egekle' ni'a che da' bena'. Bi go'o latje benne' ka' zá'gake' chio' chíx̱gekle' ni'a chia' neda', Dios chegak benne' Israel ka'. 
Dan' nži'ila' Le' ẕchíx̱gake' neda', na' ḻo yeḻa' sto' zoakza'. 
Naka' ka to benne' zi'to' ḻawgak benne' ljéža'do' ka', na' bi zej nónbi'e neda'. 
Žeye ẕla ḻáẕda'wa' dan' žé'ḻi'a wnné yoe che ližo'. Da' ẕnnégak benne' ka' chio' Le', Dios, naken ka ẕnnégaken' chia' neda'. 
Wžeža', na' bena' wbás, na' ben dítjgekle' neda', na' che ḻen ẕchix̱la'. 
Ḻezka' bwakw kwina' ḻaže' zeche'. Bḻé'egekle' neda' ka to da' ben dítjgekle'. 
Benne' yolawe' ka' wnnégake' chia'. Benne' we'j ka' ben dítjgekle' neda' ḻo da' béḻgake', 
san neda' bḻiža' Le', X̱ana' Dios, kan žaz ḻažo'o Le'. Dios, ḻo yeḻa' žeyache' ḻaže' ẕen chio', na' dan' nakkzo' Benne' weslá cheto', benle chia'. 
Bebéj neda' ḻo da' zede gan zoa'. Naken ka yoa'a ḻo gona' gže'. Bi go'o latje chazžan'. Beslá neda' ḻo na'gak benne' ka' bi ẕḻé'egekle' neda' chawe'. Naken ka yoa'a ḻo nis zil. 
Bi go'o latje gata' neda' ka to benne' ẕgache'e ḻo nis zil na', nich bi gaka' ka to benne' chejchaze' to ḻo yežw gže', gan choa'a, na' wkachen' neda' to chi'ize. 
Bechebe chia', X̱ana' Dios, dan' cháwe'ḻe'e nak yeḻa' žeyache' ḻaže' chio'. Da, gokḻen neda', dan' ẕente nak yeḻa' žeyache' ḻaže' chio'. 
Bwia kan nak da' žaken chia' neda', wen žin chio'. Dan' že' zédḻe'ela', ben byene yenlo' chia'. 
Da ka' gaze ga zoa' ni, na' beslá neda'. Beslá neda' dan' zej nyanḻe'e benne' ka' bi ẕḻé'egekle' neda' chawe'. 
Le' nnézkzelo' kan ẕchíx̱gake' neda', na' kan že' zédḻe'ela', na' kan žon dítjgekle' neda'. Ẕḻe'ekzlo' yógo'te benne' ka' ẕžá'agake' neda'. 
Dan' ẕká'ngake' neda' ka'ze žedó ḻaža'a, na' že' zédḻe'ela'. Wleza' no benne' yeyache' ḻáže'le' neda', san bi wzóa no benne'. Wleza' no benne' gon choche' neda', san bi wzóa no benne'. 
Bwáwgake' neda' da' sḻa', na' kate' wbiḻa', byé'jgake' neda' da' zichj. 
Ben ga gak lni ka' chegak benne' ka' ka to do yeḻj gan chéjgake', na' ben ga yeyák yeḻa' ba nez chégake' to gan chejchégwgake'. 
Ben ga choḻgak yej ḻáwgake' nich biž ḻé'egekle', na' ben ga ẕízetezegak benne' ka'. 
Ḻo yeḻa' ẕža'a chio' bžia yi' benne' ka'. Ḻo yeḻa' yichj ža'a chio' ben ḻégake' zi'. 
Ben ga bi soa no benne' ḻo ližgak benne' ka', na' bi soa no benne' ḻo yežlyó chégake'. 
Wžía ḻáže'gake' bennen' bsaka' zi'o, na' žẕížegake' dan' ẕzaka' bennen' beno' ḻe' we'. 
Bḻoe'e ḻaw doḻa' da' zej nbaga' benne' ka', na' bi go'o ḻégake' latje gákgake' toze ḻen benne' chawe' chio' ka'. 
Bsoḻe lagak benne' ka' ḻe'e yiche chegak benne' ka' zej nape' yeḻa' nban da' naken li ḻaže', na' bi wzojo' lágake' gan zej nyejw lagak benne' chawe' ka', 
san neda' zoa' ḻo da' ẕzáka'ḻi'a, na' že' zédḻe'ela'. Beslá neda', Dios, na' bechís neda'. 
Goḻkza' da' wká'n ẕenen La la'y che Dios chia'. Wká'n ẕena' Ḻe' ḻen da' žoe ḻawa' Ḻe'. 
Da' ni žaz ḻáže'že Dios ka to bež gota' ḻawe', o ka to biado' zej žia lozba', na' sógo'ba'. 
Ḻé'ekzegekle benne' gax̱jw ḻaže' ka' da' ni, na' yebégekle'. Le biga' ḻaw Dios, na' Ḻe' gon choche' ḻe'e. 
Ženle X̱anžon' chegak benne' ka' žiážjegekle', na' bi ẕzoe' cheḻa'ale benne' chie' ka', benne' zej nyejwe' liž ya. 
¡Le wká'n ẕene' Ḻe', ḻe'e zoale ya'abá, na' ḻe'e zoale yežlyó nga, na' ḻe'e zoale ḻawe' nisdo', na' yógo'te da' nníta'gaken yógo'te latje ka'! 
Dios beslé' benne' ka' nníta'gake' yež Sión, na' yeyone' yež ka' zej žen' ḻo yežlyó Judá, na' chejnníta'gake' ga na', na' gata' chégake' yežlyón'. 
Ḻezka' žingak ẕa'só benne' chawe' chio' ka', na' gata' chégake' yežlyón', na' benne' ka' nží'igekle' La la'y chio' chejnníta'gake' ga na'. 
