﻿SALMOS.
70.
Beslá neda', Dios. Da ka' gaze nich gákḻeno' neda', X̱ana' Dios. 
Ben ga yedoé'egekle, na' kwe' zédgekle benne' ka' žénegekle' gótgake' neda'. Ben ga yebíga'gak, na' chíx̱gekle benne' ka' žebégekle' dan' že' zedla'. 
Ben ga ga'ngak yaḻ ḻaže' ḻo da' žongak benne' ka' žon dítjgekle' neda'. 
Benne' ka' žíngake' ḻawo' Le' yebégekle', na' sóagake' ḻo yeḻa' ba nez. Benne' ka' žé'gake' Le' “Žóx̱keno'” dan' besló' ḻégake'. Ẕnnágake': “¡Ga'n ẕen Dios!” 
Ze' zedla', na' nat ni'a na'a. Da ka' gaze gákḻeno' neda', Dios. Le' nako' Benne' weslá chia', X̱ana'. Bi želo', X̱ana' Dios. 
