﻿SALMOS.
71.
Za'a ḻawo' Le', X̱ana' Dios, nich gape chi'o neda'. Ben ga biž yedoe'ela'. 
Gokḻen neda', na' beslá neda' dan' nako' chawe'. Bze nag chi'a, na' beslá neda'. 
Nako' ka to yej x̱e gan soa' chawe', na' wak yida' gan zo' Le' dot ža, na' yele. Bseḻa' no benne' yeslé' neda', dan' nako' Le' ka to yej x̱e gan zoa' choch. 
X̱ana' Dios, beslá neda' ḻo na'gak benne' ka' bebéj yíchjgake' Le', na' ḻo na'gak benne' ka' žóngake' da' ẕinnj, na' zej nake' yichj ža'a. 
Žx̱en ḻaža'a Le', X̱ana' Dios. Le' ẕwíakzo' neda' kate' ne naktia' bí'do'te. 
Le' ba nox̱kzo' neda' katen' za' golja'. Le' beno' ga bžoja' ḻo ḻe'e x̱na'a. Wká'n ẕénteza' Le'. 
Bebángekle benne' zanḻe'e kan gok chia', san Le' ẕwíakzo' binlo neda'. 
Ben ga góḻteza' da' we ḻawa' Le', na' wká'n ẕena' Le' dot ža. 
Bi wzó' neda' cheḻa'ale kate' ba ngola'. Kate' yedó ḻaža'a, bi kwej yichjo' neda'. 
Benne' ka' ẕžá'agake' neda' ẕnnégake' chia', na' benne' ka' žak ḻáže'gake' gótgake' neda' ba béngake' toze diža'. 
Ẕnnágake': “Bzoa Dios ḻe' cheḻa'ale. Le cho'o chejx̱enžo-ne' dan' bi zoa no benne' yeslé' ḻe'.” 
Dios, bi so' zi'to' ga zoa' ni. Dios chia', da ka' gaze gákḻeno' neda'. 
Ben ga yedoé'egekle, na' nítgekle benne' ka' ẕdíḻ-ḻengake' neda'. Ben ga soagak ḻo yeḻa' sto', na' chíx̱gekle benne' ka' žak ḻáže'gake' góngake' chia' da' ẕinnj, 
san neda' wx̱én ḻáže'teza' Le', na' we ḻáwteza' Le'. 
Wzenla' benne' ka' nako' chawe', na' wzéntezela' ḻégake' kan besló' neda', ḻa'kze bi nnezla' baḻ chi'i besló' neda'. 
Wchaḻjkza' che da' ẕenḻe'e da' beno' Le', X̱ana' Dios, na' wsá'a ḻáže'gak benne' ka' kan nakkzo' chawe'. 
Dios, Le' bsedlo' neda' kate' ne naktia' bí'do'te. Ẕḻoe'ela' benne' ka' ka nak da' ẕenḻe'e da' beno'. 
Bi kwej yichjo' neda' kate' ba ngola', na' ba bgocha', san be' neda' latje wzenla' ẕa'sóa' ka' ka nak yeḻa' wak chio', na' wzenla' bi'do' ka' bi na' gáljgakbe' ka nak chio', 
na' da' chawe' da' nako', da' naken ẕenḻe'e, Dios. Le' beno' da' ka' zej nakḻe'en ẕen. Dios, ¿noẕkze benne' nake' ka nako' Le'? 
Le' beno' ga wdía' ḻo da' zan da' zede, na' ḻo da' ka' bi žakgak chawe', na' gono' ga yebana' neda', na' yechiso' neda' ḻo yežw ba. 
Gono' ga gakža' ẕen, na' yeyón ẕeno' neda'. 
Neda' we ḻawkza' Le', na' chinna' da' žóḻ-ḻento'. X̱ana' Dios, goḻkza' che da' likze chio' na' chinna' da' ka'. Nako' Benne' La'y chegak benne' Israel ka'. 
Soa' ḻo yeḻa' ba nez kate' goḻkza' chio' Le', na' yebekzle be' da' nakkza' dan' beya'wo'. 
Wcháḻjteza' che da' chawe' da' nako' dot ža, na' yele, dan' beno' ga bedoé'egekle, na' bchíx̱gekle benne' ka' ben byéngake' góngake' neda' ẕia. 
