﻿SALMOS.
72.
Dios, ben ga wchi'a ḻaže' benne' wnná bia' da' žak cheto' kan ẕchi'a ḻáže'kzo' Le', na' ben chawe' x̱kwide' ka' che benne' wnná bian'. 
Naž ḻe' wchi'a ḻaže'e cháwe'do' benne' chio' ka'. Ka nak da' naken dot da' li wchi'a ḻaže'e benne' chio' ka' ẕzáka'ḻe'egake'. 
Ḻaw ya'a ka' chejga'ngak chawe' benne' chio' ka', na' ḻaw ya'ado' ka' kwézgake' ḻo da' nak chawe'. 
Wchi'a ḻaže'e benne' wláž ka' ẕzáka'ḻe'egake'. Yeslé' x̱kwide' ka' chegak benne' ka' žiážjegekle'. Wžía yi'e benne' ka' žsáka'gake' benách chio' ka'. 
Chébeteze benne' wnná bian' Le', x̱ak zoa wbíž, na' byo'. 
Gak benne' wnná bian' ka nis yejw da' žaken ga naz, na' ka ẕlelj da' žeẕjwn ḻo yežlyó. 
Ḻo ža ka' che benne' wnná bian' gak da' chawe', na' ga'ngak cháwe'do' benne' ka' x̱ak zoa byo'. 
Nna bi'e dot yežlyó nga, žoa'a Yegw Éufrates, na' do ẕente yežlyó. 
Wzóa ẕibgak benne' dot yežlyó ḻawe' ḻe', na' wzex̱jwe' ḻáže'gak benne' ka' ẕžá'agake' ḻe'. 
Benne' ẕnna bi'e yež Tarsis, na' benne' ẕnna bi'e yež zi'to' ka' zedjnoé'e da' wnéẕjwgake' chie', na' benne' ẕnna bi'e yež Sabá, na' benne' ẕnna bi'e yežlyó Seba wnéẕjwgake' chie' yeḻa' wnni'a. 
Yógo'te benne' wnná bia' ka' wzóa ẕíbgake' ḻawe' ḻe, na' benne' yógo'te yež góngake' žin chie'. 
Ḻe' yeslé' benne' ka' žiážjegekle', benne' ka' žḻížgake' ḻe', na' yeslé' benne' ka' ẕzáka'gake', na' bi zoa no benne' gákḻene' ḻégake'. 
Yeyache' ḻáže'le' benne' yache' ka', na' benne' ka' žiážjegekle'. Yeslé' benne' yache' ka' nich sóagake' nbángake'. 
Yeya'we' benne' yache' ka' ḻo na'gak benne' wen ḻaže' ka', benne' yichj ža'a ka', na' gon byene' yeslé' benne' ka' ḻo na'gak benne' wet benne' ka'. 
Soa nban benne' wnná bian', na' wnéẕjwgake' chie' ya oro che yež Sabá, na' nnábtezgekle benne' ka' gakḻen Dios ḻe', na' dot ža, na' yele nnábgekle' Dios gon chawe'e benne' wnná bian'. 
Gázgake' to ẕíga'do'ze ẕoa' stribe ḻo yežlyó, na' ḻaw ya'ado' chégake' ka', na' kwíaḻe'e linne chen kan ẕbian ḻaw Ya'a Líbano, na' benne' ka' nníta'gake' ḻo yež ka' yángake' kan žon yix̱e' da' žen' yežlyó. 
Sóateze la benne' wnná bian'. Wcháḻjtezgake' che le' x̱ak zoa wbíž. Ni'a chie' ḻe' gak yeḻa' ba nez chegak benách ka', na' nnágake' nak chie' yeḻa' ba nez ẕen. 
Cháwe'ḻe'e nak X̱anžo Dios. Nake' Dios chegak benne' Israel ka', na' toze' Ḻe' žone' da' ka' žóngaken ga žebánležo. 
Cháwe'ḻe'e nak La la'y chie' dan' náktezen ẕen, na' dot yežlyó nga ḻé'egekle' yeḻa' ẕen chie'. Ka'kze naken, na' ka'kze gaken. 
Ga ni ze ḻaw da' wnná Dabí, ẕi'n Isaí, dan' bcháḻjḻene' Dios. 
