﻿SALMOS.
73.
Da' likze Dios ben chawe'e benne' Israel ka', benne' ka' zej nake' dot ḻi ḻaže' ḻawe' Ḻe', 
san neda' wzóa' chejchegwa', na' wzóa' gona' to da' ẕinnj. 
Bge'ela' benne' wnni'a ka', kate' bḻe'ela' kan žak chawe' chegak benne' ka' nbej yíchjgake' Dios. 
Benne' ki bi zej že' zedle che yeḻa' got, dan' zej zóaḻi'e chawe'. 
Bi ẕzáka'gake' kan ẕzáka'gak yezika' benne' ka', na' bi zoa da žak chégake' kan žak chegak yezíka'že'. 
Che ḻen ẕka'n ẕen kwíngake'. Žónteze žóngake' da' bi nak chawe'. 
Ẕgól-ḻe'egake' dan' žáwḻe'egake' da' cháwe'ḻe'e. Ẕzí'ḻe'egake' da' ẕdan ḻáže'gake'. 
Žon dítjgekle' Dios, na' ẕnnégake' chie', na' žóngake' da' ẕinnj. Ḻo yeḻa' ẕka'n ẕen kwíngake' ẕcháḻjgake' da' ẕente. 
Ẕnnégake' che da' ka' zej zoan ya'abá, na' ẕcháḻjgake' ka benne' ka' zej nape' dot yežlyó. 
Che ḻen yezika' benách ka' želyenle' x̱tíža'gake', na' ẕzi' ḻo ná'gake' da' ẕnnágake'. 
Ẕnnagak benne' wnni'a ka': “¿Biẕkze nnezle Dios? ¿Ẕḻé'ekzle Bennen' zoe' ža'le da' žonžo?” 
Benne' ki zej nbej yíchjgake' Dios, na' zej zoe' binlo, na' ẕzí'gakže' yeḻa' wnni'a. 
Da' likze, dáche'ze goka' dot ḻi ḻaže', na' bi be bena' da' bi nak chawe', 
san tža tža wẕáka'ḻi'a, na' žsaka' zí'gake' neda' yógo'te ža. 
Chela' nnia' neda': wchaḻja' kan ẕchaḻjgak benne' ka', na' wka'na' bénne'do' chio' ka' ka'ze, Dios. 
Kate' blab ḻaža'a nich chejni'ila' da' ni, wžé' zédḻe'ela', 
san kate' wyoá'a ḻo latje la'y che Dios, na' gókbe'ela' da' gak chegak benne' ka' ga ze ḻawte. 
Da' likze beno' chegak benne' ka' chejchégwgake', na' gono' ga kwia yí'gakkze'. 
Ḻa' kwia yí'tegake'. Yeḻa' ẕžebe senen ḻégake', na' goten ḻégake'. 
Zej nake' ka to da' bḻe'elto' to ḻo bichgale dan' ẕnniten kate' žebanžo. Ka'kze gaken, X̱anto' Dios. Kate' so žo'o, wka'no' ka'ze da' bḻoe'el kwingak benne' ka'. 
Kate' bge'ela' benne' ka', wžé' zédḻe'ele ḻáẕda'wa'. 
Goka' ka to bia yix̱e' ḻawo' Le', dan' gok zide yichja', na' bi bejni'ila', 
san wzóaḻenteza' Le', na' nóx̱wkzo' na'a ḻi ža. 
Bsedlo' neda' nich gona' da' ẕḻoe'elo' neda', na' te na'a yezí' ḻo no'o neda' ḻo ya'abá chio'. 
Bi zoa no benne' yoble chia' ya'abá san tozo' Le', na' bi be zoa da' ẕdan ḻaža'a yežlyó nga san tozo' Le'. 
Žedó ḻaže' beḻa' žen chia', na' ḻáẕda'wa', san Dios nake' Benne' žon choche' neda', na' nake' yeḻa' ba nez ẕen chia' to chi'ize. 
Benne' ka' žekwásgake' gan zo' nítgekle'. Wžía yi'o yógo'te benne' ka' kwej yíchjgake' Le'. 
San neda', žak chawe' chia' dan' wbiga' ḻaw Dios. Wx̱én ḻáže'teza' X̱anžo Dios, na' wchaḻjkza' che da' ẕente da' bene' Ḻe'. 
