﻿SALMOS.
74.
X̱anto' Dios, ¿wléj yichjo' neto' to chi'ize? ¿Ẕžo'o neto', ẕila' chio' ka'? 
Bsa' ḻaže' benne' chio' ka', benne' ka' wẕi'o ža ni'te, benne' ka' beya'wo' nich gono' ḻégake' benne' chekzo' ka', benne' ka' zej zoe' ḻaw Ya'a Sión nga, ga ni zoakzo' Le'. 
Da ka' gaze yedjḻe'elo' ka nbia yi' yež nga, na' ka nak da' ẕinnj da' bengak benne' ka' che latje la'y chio'. 
Ẕbéžeya'agak benne' ka' bi ẕḻé'egekle' Le' chawe' gachje ḻawle gan zej ndobe benne' chio' ka'. Bdá'gake' nga da' ẕḻoe'elen yo'oto' ḻo ná'gake'. 
Bchínnjgake' yež ni, ka žon to benne' ẕchoge' yógo'te yag ka' zej zen to ḻaw ya'a. 
Ḻen ya wag chégake' ka', na' ḻen yag chégake' ka', bchínnjgake' yógo'te da' x̱tan ka' che yodo' chio'. 
Bzéygake' latje la'y chio'. Bká'ngake' ka'ze ližkzo' Le'. Bchínnjgaken'. 
Wnnágake': “¡Wžía yi'žo ḻégake' to chi'ize!” Bzéygake' yógo'te yo'o gan bká'n ẕento' Le' dot ḻo yežlyó chio'. 
Biž bi ẕḻe'elto' da' nak la'y, dan' bchisto' ḻo yežlyó cheto'. Biž zoa no benne' wchaḻje' ḻo wlazo' Le', na' bi zoa no benne' ladjw neto', benne' nnezle' batx̱ yelato'. 
X̱anto' Dios, ¿to chi'ize wchix̱gak benne' ka' neto', benne' ka' žsaka' zí'gake' neto'? ¿To chi'ize nnegak benne' ka' bi ẕḻé'egekle' Le' chawe' che La la'y chio' Le'? 
¿Biẕ chen' bi be žono' chegak benne' ka'? ¿Biẕ chen' bi ẕžia yi'o benne' wen da' ẕinnj ka'? 
San Le', Dios, nako' Benne' Wnná Bia' chia' ža ni'te. Le' bžia yi'o benne' ka' dot ḻo yežlyó nga. 
Ḻen yeḻa' wak ẕen chio' beno' nisdo' chope ḻa'a. Wló'o yichj bia ẕenḻe'e ka' ḻo nisdo'. 
Bzoẕjo' yichj bia ẕenḻe'e, bian' leba' lebiatán, na' beno' ga bdawgak bia yix̱e' ka' ḻeba', bia ka' zej zoaba' ḻo yo biž. 
Beno' ga golj nis bej ka', na' nis yegw ka'. Besbižo' yegw ẕen ka'. 
Chio' Le' nak ḻawe' ža, na' ḻezka' chio' nak yele. Le' bnnito'o byo', na' wbíž gan zej zoan. 
Bnnitkzo' to chi'ize yógo'te da' zej že' yežlyó nga. Le' beno' byo' wbá ka', na' byo' zag ka'. 
Bejsá' ḻaže' da' ni: benne' ka' bi ẕḻé'egekle' Le' chawe' ben dítjgekle' Le', X̱anto' Dios, na' benne' yaḻ ḻaže' ka' wnnégake' che La la'y chio' Le'. 
Bi gaḻ ḻažo'o neto', benne' chio' ka', to chi'ize. Bi wká'n neto', benne' ka' nži'ikzlo', ḻo na'gak benne' ka' zej nake' ka bia snia ka'. Zoato' ḻáwgake' ka zej nak gogoldo' ka'. 
Bejsá' ḻaže' diža' da' bénḻeno' neto', dan' gáte'teze nníta'gak benne' wen da' ẕinnj ka'. Ẕdágake' do ẕente yežlyó nga. 
Bi go'o latje yedoé'egekle benne' gax̱jw ḻaže' ka'. Benne' ka' ẕzáka'ḻe'egake', na' benne' ka' žiážjegekle' we ḻáwgake' La la'y chio' Le'. 
Wzó ža', Dios. Ben kan wnnakzo' gono'. Bejsá' ḻaže' kan žongak benne' yaḻ ḻaže' ka', benne' ka' ẕká'ngake' ka'ze La la'y chio' tža tža. 
Bi gaḻ ḻažo'o da' wnné zi'gak benne' wen da' ẕinnj ka' chio' Le'. Néntezle žo'osbé da' žongak benne' ka' ẕží'igake' chio' Le'. 
