﻿SALMOS.
76.
Zej nonbia' benne' Judá ka' Dios, na' La la'y chie' nga'nen ẕen ladjw benne' Israel ka'. 
Ḻo yež Salem zoa latje la'y chie'. Ḻo yež Sión zoa gan zoakze'. 
Ḻo latjen' wdíchj Dios yag ntoche' ka' che wdiḻe, na' yag ntóche'do' ka', na' ya da' žape chi'in benne' ka' ḻo wdiḻe, na' ya ntoche' ka', da' ka' ẕkóngekle' žin ḻo wdiḻe. 
¡Benne' ẕenḻe'e nako' Le'! ¡Nako' waḻže ka ya'a ẕen ka'! 
Chejchégwgak benne' waḻe ka', na' gásḻasgake'. Nitó benne' waḻe bi yechís ne'e nich tíḻ-ḻene' Le'. 
Dios chegak benne' Israel ka', kate' wtiḻo' benne' ka' besḻaso' ḻégake', na' bia ka' žíagake'. 
Le' nako' Bennen' žaḻa' žébežo. ¿Noẕ benne' gak sie' ḻawo' Le' kate' ẕžo'o? 
Wnnó' wchi'a ḻažo'o benne' ka' ne zo' ya'abá. Ẕžébegak benne' ka' ḻo yežlyó, dan' ẕbézgake' 
ža so žo'o Le', Dios, nich wchi'a ḻažo'o benách ka', na' nich yesló' yógo'te benne' gax̱jw ḻaže' ka'. 
Da' likze yeḻa' ẕža'a chegak benne' ka' gaken to da' gon ga ga'n ẕeno' Le'. Wlék žio' yeḻa' ẕža'a chegak benne' ka' zej nga'ne'. 
Le wchebe ḻaže' da' gonnle che Dios, na' le wneẕjwn' che X̱anžon', Dios chele. Benne' ka' nníta'gake' do ẕente ḻá'gake' zej noe'e da' wnéẕjwgake' che Dios, Bennen' ẕžébežo. 
Ẕži'i Dios che da' yo'o ḻo yichj ḻáẕdo'gak benne' blo ka'. Ḻe' ẕchebe' benne' wnná bia' ka' nníta'gake' yežlyó. 
