﻿SALMOS.
77.
Ḻen chi'a bḻiža' Dios. Bḻiža' Dios, na' Ḻe' bze nage' chia'. 
Žoa'a ḻaw X̱anžon' kate' ẕzáka'ḻi'a. Žel ẕchis na'a ḻawe' Ḻe', na' bi zoa' žize. Bi bi'a latje no benne' yeyón ẕene' neda'. 
Bsa' ḻaža'a che Dios, na' wžé' zedla'. Bsa' ḻaža'a che da' bena', na' bedó ḻaža'a. 
Dios, bi bi'o latje tasa'. Wžé' zédḻe'ela', na' bi be gok nnia'. 
Blab ḻaža'a ka zej nak ža ka' wdégaken, na' ka zej nak yiz ka' ba wdégaken. 
Bsa' ḻaža'a ka nak da' beḻkza' yele ka', na' blab ḻáže'kza' kan zej naken, na' wnnabla' ḻo be' da' nakkza': 
¿Bzoa X̱anžon' žo'o cheḻa'ale to chi'ize, na' biž gákḻene' žo'o? 
¿Batkle yeyache' ḻáže'le' žo'o? ¿Batkle gone' da' wchebe ḻaže'e gone'? 
¿Goḻ ḻáže'kze Dios yeyache' ḻáže'le' žo'o? ¿Ẕže'e žo'o nich biž yeyache' ḻáže'le' žo'o? 
Naž wnnía': ki žona' dan' yoa'a yižwé'. Che ḻen chejsá' ḻaža'a yógo'te da' ẕente da' ben Dios ẕente ḻo yiz ka' ba wdégaken. 
Chejsá' ḻaža'a da' ẕente ka' da' beno' Le', Jah. O', chejsá' ḻaža'a da' beno' ža ni'te, da' ka' žóngaken ga žebanlto'. 
Wláb ḻaža'a ka nak yógo'te da' beno', na' wchaḻja' ka zej nak da' ka'. 
Dios, la'y nak da' ẕchi'lo' neto' gonto'. ¿Zoa yetó Dios nake' benne' ẕen ka nako' Le'? 
Le' nako' Dios, ẕnno' da' žonen ga žebanlto'. Bḻoe'elo' yógo'te benne' yežlyó nakḻe'e ẕen yeḻa' wak chio'. 
Ḻen yeḻa' wak chio' beya'wo' benne' chio' ka', ẕa'só Jakob ka', na' ẕa'só José ka'. 
Yegw nis ka' bḻé'egeklen Le', Dios. Bḻé'egekle yegw nis ka' Le', na' bžébeḻe'egaken. Ḻezka' wžé' zédgekle nisdo' gže' ka'. 
Nis yejw zil bžojen ḻo bejw gasj ka', na' wnneḻe'e wzió', na' wyasḻe'e yes wzión'. 
Ḻo be' bdone' wnneḻe'e wzió' chion'. Bza'ní' yes wzión' do ẕente yežlyó. Wẕo'ḻe'e, na' wẕize yežlyón'. 
Bsaljo' nez gachj ḻawle nisdo', na' ḻawe' nis zil ka' wdekzo' Le', san bi nak bia' gan blejo'. 
Bchi'o benne' chio' ka' ka ẕila' ka' ḻo na' Moisés, na' ḻo na' Aarón. 
