﻿SALMOS.
78.
Le yenle, ḻe'e, benne' chia' ka', da' žsedla'. Le wzé nag binlo da' ẕchaḻja'. 
Wkonla' žin diža' ka' kan ẕchaḻjgak benne' žejní'il ka', na' wsá' ḻáža'a ḻe'e da' goken bagáche'ze ža ni'te, 
da' ka' benlžo, na' da' nnezlžo, da' ka' bzéngekle x̱a x̱to'žo ka' žo'o. 
Bi wkáche'žo da' ka' ḻawgak ẕi'nžo ka'. Wzénkzelžo ẕi'nžo ka' ka nak yeḻa' ẕen che X̱anžon', yeḻa' wak chien', na' da' ẕen ka' da' bene'. 
Bchi'le' benne' Israel ka' da' žon byenen góngake', na' naken da' žaḻa' gongak ẕa'só Jakob ka'. Bchi'le' x̱a x̱to'žo wdé ka', wzéngekle' ẕí'ngake' ka' ka nak da' wnnakze' Ḻe', 
nich nnézgekle x̱kwide' ka' za' gáljgakbe' kan naken, na' wzéngeklbe' ẕí'ngakbe' ka' da' ẕchi'le' ḻégakbe', 
nich wx̱én ḻáže'gakbe' Dios, na' bi gaḻ ḻáže'gakbe' da' ka' ben Dios, na' nich góngakbe' da' ka' bchi'le' ḻégakbe', 
na' bi gákgakbe' kan gokgak x̱a x̱tó'gakbe' ka', benne' ka' bi béngake' da' bchi'le' ḻégake', na' bží'igake' chie' Ḻe', na' bi bx̱en ḻáže'gake' Dios dot ḻáže'gake'. Ḻo be' da' zej nakkze' bi gókgake' ḻi ḻaže' ḻaw Dios. 
Benne' ẕa'só Efraín ka', benne' zej noe'e da' ẕkóngekle' žin ḻo wdiḻe bẕónnjgake' gan žak wdiḻe. 
Bi béngake' kan ẕnna diža' da' benḻen Dios ḻégake', na' bi béngake' dan' bchi'le' ḻégake'. 
Goḻ ḻáže'gake' da' ka' ben Dios, na' yeḻa' ẕen da' bḻoe'ele' ḻégake'. 
Bene' yeḻa' wak ẕen ka' ḻawgak x̱a x̱tó'gake' ka' ḻo yežlyó Egipto, na' ḻo yežlyó Soán. 
Bsaljwe' nez ḻo nisdo' gan wdegak benne' ka'. Bene' nisdon' ka ya'ado' ka' cheḻa'a weje. 
Te ža bḻoe'ele' benne' ka' nez ḻen to bejw gasj da' bnáwgake', na' žel ḻen to bejw da' bsa'nín'. 
Wḻé'e yej ka' gan nak yo biž, na' bye'je' benne' ka' nis da' bžojen ḻe'egak yej ka' ka to yegw nis. 
Bene' ga bžoj to yegw nis ḻe'e yej na', na' goken to yegw ẕen, 
san béngakže' doḻa' ḻaw Dios ḻo latje dach, na' bží'igake' che Dios, Bennen' nape' dot yeḻa' wak. 
Ni'a che da' wdán ḻáže'gake' béngake' ga bža'a Dios. Wnnábgekle' Ḻe' da' gáwgake' ka wdán ḻáže'zegake'. 
Wnnégake' che Dios, na' wnnágake': “¿Wak gonn Dios da' gawžo ladjw yix̱e' nga? 
Da' likze wlé'e yej na', na' bžoj nisen', dan' goken ka to yegw ẕen, san, ¿wak gonne' chežo yet, na' gonne' beḻa' da' gawžo?” 
Che ḻen bža'a X̱anžon' kate' benle' da' ni, na' bseḻe'e to yi' da' bzeyen baḻ benne' chie' ka', na' bgole yeḻa' ẕža'a chie' ḻen benne' Israel ka', 
dan' bi bejḻé'gake' che Dios, na' bi bx̱en ḻáže'gake' Ḻe' yeslé' ḻégake', 
san Dios bseḻe'e bejw ẕan ya'abá, na' bsaljwe' gan ẕžoj da' žseḻe'e zaka' ya'abá, 
na' bene' ga bex̱jw yet maná kan žak yejw, dan' bdawgak benne' chie' ka'. Bneẕjwe' ḻégake' da' naken ka ẕoa' che ya'abá. 
Bdáwgake' da' žawgak wbás che ya'abá ka'. Bséḻa'ḻi'e da' bdáwgake', na' béljgekle'. 
Bene' ga gok to be' da' zan' cheḻa'ale gan ẕḻa' wbíž, na' ḻen yeḻa' wak chie' bene' ga gok be' dan' zan' cheḻa'ale gan ẕde wbíž byo' zag ka', 
na' ka bix̱te yo bseḻe'e beḻa' da' gáwgake', biado' ka' zej zoa x̱ílgakba', da' zanže ka yož da' žen' žoa'a to yegw ẕen. 
Bene' ga béx̱jwgakba' gan zej nnita' benne' ka', na' do ẕente gan zej da' yo'o yid chégake' ka'. 
Bdáwgake'-ba', na' béljgekle'. Dios benne' chégake' da' wdán ḻáže'gake', 
san kate' bi na' yéljgekle', na' ne žáwgake'-ba', 
na' bža'a Dios benne' ka' na' bete' benne' Israel ka' zej nakže' benne' waḻe, na' benne' ka' zej nakže' benne' wak. 
Ḻa'kze bene' ki, na' béngakže' doḻa', na' ḻa'kze bḻé'egekle' yeḻa' wak ka' da' bene', bi bx̱en ḻáže'gake' Ḻe'. 
Che ḻen bene' nbabze ža chegak benne' ka', na' gókgaken ka to be' da' žeka'ažo, na' ka zej nak yiz da' wnníta'gake' bdie' ḻégake' ḻo da' wẕáka'gake'. 
Kate' bete' baḻ benne' ka', na' yezíka'že' beyákgake' che Dios. Beyát ḻáže'gake', na' dot ḻáže'gake' bḻížgake' Ḻe'. 
Bejsá' ḻáže'gake' nak Dios Benne' žape chi'e ḻégake' na' nape Dios dot yeḻa' ẕen. Ḻekze' beya'we' ḻégake', 
san bi gok ḻi ḻaže' da' wnnábgekle', dan' ben ḻáže'gake' ḻaw Dios. 
Bi gok ḻi ḻáže'gake' ḻen Ḻe', na' bi béngake' dot ḻáže'gake' ka nak x̱tiže'e dan' bénḻene' žo'o. 
San Dios beyache' ḻáže'le' chegak benne' ka', na' benít ḻawe' x̱tóḻa'gake', na' bi bžia yi'e ḻégake'. Zan chi'i beké'e yeḻa' ẕža'a chie', na' bi bže'e ḻégake' dot kan bsa' ḻaže'e. 
Bejsá' ḻaže'e zej nakze' beḻa' žen. Zej nake' ka to be' da' ẕden, na' bi yežinen. 
Zan chi'i bží'igake' chie' Ḻe' ḻo latje dachen', na' zan chi'i béngake' ga gok nyache' ḻaže'e Ḻe'. 
Zan chi'i béngake' da' bi de chawe' Dios, na' béngake' ga bža'a Dios la'y chegak benne' Israel ka'. 
Goḻ ḻáže'gake' ka nak yeḻa' wak ẕen chie', na' ka bene' ḻo ža ka' kate' beya'we' ḻégake' ḻo da' wẕáka'gake', 
kate' bene' yeḻa' wak ẕen ka' ḻo yežlyó Egipto, na' bḻoe'ele' da' ka' da' žóngaken ga žebanlžo, da' ka' bene' ḻo yežlyó Soán. 
Bene' ga beyák yegw chegak benne' Egipto ka' žen, na' biž gok yé'jgake' nisen'. 
Bseḻe'e bi'a ka' ladjw benne' ka', bia ka' bsáka'gakba' ḻégake'. Bseḻe'e blož ka' nich bchínnjgakba' yežlyó chégake'. 
Bseḻe'e biche' zo ka' nich bdáwgakba' linne chégake', na' bžia yí'gakba' da' zej den ḻo yežlyó chégake'. 
Bseḻe'e yej nis ẕen da' bchinnjen lba uba chégake' ka', na' bseḻe'e da' zag dan' besbižen yag higo chégake' ka'. 
Bseḻe'e yej nis ẕen da' beten bia yix̱e' chégake' ka', na' bseḻe'e yes wzió' da' beten ẕila' chégake' ka'. 
Bene' ga wẕáka'ḻe'egak benne' Egipto ka', dan' bžá'aḻi'e ḻégake', na' bseḻe'e da' ka' gókgaken ka wbás zan che ya'abá nich wsaka' zí'gake' ḻégake'. 
Bi bsane' yeḻa' ẕža'a chie', na' bi benít ḻawe' chégake' nich bi gátgake', san bete' zángake' ḻen to yižwé' ẕen. 
Bete' bi' byo nežw ka' chegak benne' ka', bi' byo nežw ka' chegak benne' Egipto ka'. 
Naž bchi'e benne' chie' ka' ka to benne' ẕchi'e ẕila' ka', na' bchi'e ḻégake' ḻe'e latje dach. 
Bchi'e ḻégake' dot chawe', na' bi be bžébegake', san benne' Egipto ka', benne' bi bḻé'egekle' ḻégake' chawe', bete' ḻégake' ḻo nisdo'. 
Bchi'e benách chie' ka' ḻo yežlyó la'y chie', gan zej nnita' ya'a ka' wleje' Ḻekze' ḻo na'gak benne' ka' wnníta'gake' nga. 
Blage' ḻégake' ḻo yežlyón' ḻawgak benách chie' ka'. Bdise' yežlyó chégaken' ládjwgak benne' Israel ka'. Bnnite'e ḻégake' ližgak benne' ka' bebeje' ga na', 
san da' yoble béngake' da' bi de chawe' Dios, na' bža'a Dios, Bennen' nape' dot yeḻa' ẕen. Bi béngake' da' bchi'le' ḻégake'. 
Da yoble bží'igake' che Dios kan bengak x̱a x̱tó'gake' ka'. Gókgake' ka to yag ntóche'do' dan' bi zejen to wḻize. 
Béngake' ga bže'e Ḻe' ḻen bkog ka' gan bka'n ẕéngake' lo'a ka', na' ni'a che lo'a chégake' ka' bžá'aḻe'e Dios. 
Bža'a Dios kate' bḻe'ele' da' ki, na' bi bḻe'ele' benne' chie' ka' chawe', benne' Israel ka'. 
Bsan ḻaže'e yo'o yid la'y chie' dan' wzóan yež Silo, yo'o yiden' gan wzoakze' Ḻe' ladjw benne' ka'. 
Bi'e latje bkwasgak benne' ka' bi bḻé'egekle' žo'o chawe' kaj la'y chien', dan' ẕḻoe'e ḻawn yeḻa' wak, na' yeḻa' ẕen chie'. 
Bže'e benne' chie' ka', na' bdie' ḻégake' ḻo na'gak benne' ka' bétgake' zángake'. 
X̱kwide' byo ka' chégake' gótgakbe' ḻo wdiḻe, na' bi bga'n no benne' byo kwide', benne' wchág ná'ḻenbe' no'le kwide' ka'. 
Ḻezka' gotgak bx̱oz ka' chégake' ḻo wdiḻen', na' no'le wzebe ka' chegak bx̱oz ka' bi wžeže nyáche'gake' ni'a chégake'. 
Naž gok X̱anžon' ka to benne' žebane' ḻo bichgale. Goke' ka to benne' waḻe ẕbéžeyi'e kate' ba ne'je' x̱is uba waḻ. 
Blage' benne' ka' bi bḻé'egekle' ḻégake' chawe', na' bka'ne' ḻégake' ka'ze to chi'ize. 
Bzoe' cheḻa'ale ẕa'só José ka', na' bi wžíe' ẕa'só Efraín ka', 
san wžíe' ẕa'só Judá ka', na' Ya'a Sión, dan' nží'iḻe'ele'. 
Ḻaw ya'a na' bene' yodo' la'y chie', dan' goken ka nak yodo' dan' zoan ya'abá. Bzoa chochen' to chi'ize, ka nakkze yežlyó nga. 
Wžíe' Dabí, benne' wen žin chie'. Bebeje' ḻe' gan zej nnita' ẕila' ka'. 
Bkwase' ḻe' gan zoe' žape chi'e ẕila' ka', nich gake' benne' wnná bia', benne' gape chi'e benách chie' ka', ẕa'só Jakob ka', benne' ka' zej nake' benne' Israel ka'. 
Dabín' ḻo yeḻa' gax̱jw ḻaže' chie' wdape chi'e benne' ka' zej nake' benne' ka' che Dios. Wdape chi'e ḻégake' ḻen yeḻa' wak chie' ḻo yeḻa' dot ḻi ḻaže' chie'. 
