﻿SALMOS.
79.
X̱anto' Dios, yo'ogak benne' zi'to' ka' ḻo yežlyó chegak benne' chio' ka'. Bcá'ngake' ca'ze yodo' la'y chio'. Bchínnjgake' yež Jerusalén. 
Bká'ngake' beḻa' žen gat chegak benne' wen žin chio' ka' gan bdawgak lab ka' ḻégake'. Bdawgak bia yix̱e' ka' benne' chio' ka'. 
Bláljgake' žen chegak benne' ka' ka nis ḻo nez ka' che yež Jerusalén, na' bi wzóa no benne' wkache'e ḻégake'. 
Benne' yež gawze ka' ẕchíx̱gake' neto'. Yógo'te benne' ka' žon dítjgekle' neto', na' ẕká'ngake' neto' ka'ze. 
¿To chi'ize gak ki cheto', X̱anto' Dios? ¿To chi'ize ẕžo'o neto'? ¿To chi'ize gak yeḻa' ẕža'a chio' ka to yi'? 
Bža'agak benne' yež ka', benne' bi zej nónbi'e Le', na' benne' zi'to' ka', benne' bi žḻížgake' Le'. 
Bžia yí'gake' ẕa'só Jakob ka', na' bchínnjgake' lížgake'. 
Bi yesbago'o neto' da' ẕia da' wbága'gak x̱a x̱na' gole cheto' ka'. Da ka' gaze yeyache' ḻáže'lo' neto', dan' bedó ḻáže'to'. 
Gokḻen neto', Dios, Benne' Weslá cheto', nich ga'n ẕen La la'y chio'. Beslá neto', na' bsoḻe doḻa' cheto' nich ga'n ẕen La la'y chio', 
dan' nnagak benne' ka': “¿Ganẕkze Dios chegak benne' ka'?” Bezí' wzón benne' ka' bétgake' benne' wen žin chio' ka'. 
Ben ki nich yógo'te benne' chio' ka', benne' ka' zej yoe'e ḻo na'gak benne' ka' bi ẕḻé'egekle' neto' chawe', ḻé'egekle' da' gono'. Ḻen yeḻa' wak ẕen chio' beslá benne' ka' nžog chégake' gátgake'. 
Bneẕjw chegak benne' yež gawze ka' yegaže kwe' da' ẕinnj ka da' béngake', dan' ben dítjgekle' Le', X̱anto' Dios. 
Neto', benne' chio' ka', na' ẕila' chio' ka', we ḻawto' Le' to chi'ize. Góḻtezeto' da' wká'n ẕento' Le'. 
