﻿SALMOS.
80.
Benle cheto', Dios. Le' žape chi'o benne' Israel ka'. Le' žape chi'o ẕa'só Jwsé ka' ka ẕila' ka'. Ži'o latje blo chio' dan' zoan ḻáwlegak wbás chio' ka' nzi' lágake' kerubín. 
Bḻoe'e ḻaw yeḻa' ẕen chio' ḻawgak ẕa'só Efraín, na' Benjamín, na' Manasés. Bḻoe'e ḻaw yeḻa' wak chio', na' da, yesló' neto'. 
Bezí' neto', Dios. Beyache' ḻaže'l neto', na' yelato'. 
X̱anto' Dios, napo' dot yeḻa' wak. ¿To chi'ize žo'o neto' na' bi yenlo' da' nnablto' Le'? 
Beno' Le' ga žak nyache' ḻáže'to', na' nis ẕbežto' naken da' že'j žawto'. 
Bi'o latje benne' gawze ka' bká'ngake' neto' ka'ze. Benne' ka' ẕžá'agake' neto' ben dítjgekle' neto'. 
Bezí' neto', Dios. Napkzo' Le' dot yeḻa' wak. Beyache' ḻaže'l neto', na' yelato'. 
Bebejo' neto' ka to lba uba ḻo yežlyó Egipto. Blago' benne' ka' wnníta'gake' nga, na' gozo' lba uba na' nga. 
Wdape chi'o lba uba na' nich golen. Ben lba uba na' lwen, na' bgakwn yežlyón'. 
Wló'on ẕoḻ yógo'te ya'a ka', na' ni'a ne'n ka' wló'ogaken ẕoḻ yag sedro ẕen ka'. 
Bzáḻa'gaken ni'a ne'n, da' ka' bžíngaken žoa'a nisdo', na' bžíngaken žoa'a yegw Eufrates. 
¿Biẕ chen' bkwaso' le'je da' wdáp chi'in lban'? Na'a benne' ka' ẕdégake' ga na' ẕbángake' uba chen. 
Ẕlejgak koch yix̱e' ka' lba uba na', na' bia yix̱e' ka' žáwgakban'. 
Bedá cheto', Dios, napkzo' Le' dot yeḻa' wak. Bwia neto' zaka' ya'abá, gan zoakzo', na' da yedjḻe'elo' da' žaken che lba uba chion'. 
Da, yesló' lba uba ni, dan' gozkzo' Le'. Ẕiže lba uba na', dan' bzoa chochon' naken chio'. 
Benne' ka' bi ẕḻé'egekle' neto' chawe' bchóggake' lba na', na' bẕéngaken' yi'. Bwia benne' ka' ḻo yeḻa' ẕža'a chio', na' bžia yi' ḻégake'. 
Bzoa choch, na' wdáp chi'i benne' ka' ba wžío', na' ẕi'ngak benne' ka' bzoa chocho' ḻégake'. 
Batkle yebéj yichjto' Le' nitó chi'i. Bkache' chawe' neto', na' wx̱én ḻáže'to' La la'y chio'. 
X̱anto' Dios, napkzo' Le' dot yeḻa' wak, bezí' neto'. Beyache' ḻaže'l neto', na' yelato'. 
