﻿SALMOS.
81.
Ḻen yeḻa' žebele le goḻ che Dios, Bennen' žon choche' žo'o. Ḻo yeḻa' ba nez chele le kwéžeya'a ḻaw Dios chegak ẕa'só Jakob. 
Le goḻ, na' le kapa' yiddo' ka'. Le chinn x̱tan da' ka' žóḻ-ḻenle. 
Le wkweže lozgak bia ka' kate' nak byo' že'n, dan' naken ža žónteze žonžo lni la'y. 
Naken to da' žon byene gongak benne' Israel ka', dan' bchi'le Dios gongak ẕa'só Jakob ka'. 
Bzoen' ka to da' wḻoé'elen ẕa'só Jwsé ka' da' ben Dios katen' bžójgake' ḻo yežlyó Egipto, gan benla' to x̱tíža'gak benne' ka' da' bi bejni'ila'. 
Ẕnna Dios: “Beká'a ywa' da' bdá'gake' x̱kóže'lgak benne' chia' ka'. Beslá' benne' chia' ka' ḻo na'gak benne' ka' bkóngekle' ḻégake' žin. 
Ḻo da' wẕáka'le, bḻižle neda', na' gókḻena' ḻe'e. Becheba' chele gan wzóa' to ḻo bejw gasj katen' wnnéḻe'e wzió', na' wẕí' bi'a ḻe'e gan de bej nis da' nzin' Meriba. 
Le yenle, benne' chia' ka', na' wzejni'ila' ḻe'e, benne' Israel ka', cha' žaz ḻáže'le si'le da' ẕnnia'. 
Bi si' ḻo na'le dios ka' chegak benne' yež yobl ka'. Bi wzó ẕible ḻawgak dios ka' chegak benne' zi'to' ka'. 
Neda', Dios chele, naka' X̱anle. Bebeja' ḻe'e ḻo yežlyó Egipto. Le wsaljw žoa'ale, na' gonna' da' gawle, 
san benne' chia' ka' bi béngake' da' wnnía'. Benne' Israel ka' bi wyáz ḻáže'gake' si' ḻo ná'gake' x̱tiža'a. 
Che ḻen wléj yichja' benne' ka' dan' gókgake' ḻaẕdo' zide. Béngake' da' wdán ḻáže'gakze'. 
Chela' wzé naggak benne' chia' ka' da' wnnía', na' chela' bengak benne' Israel ka' da' bchaḻja', 
na' ka' gaze wžía yi'a benne' ka' bi ẕḻé'egekle' ḻégake' chawe', na' tíḻ-ḻena' benne' ka' ẕdíḻ-ḻengake' ḻégake'.” 
Chela' bengak benne' Israel ki, na' benne' ka' ẕžá'agake' X̱anžo Dios góngake' kan ẕnna x̱tíže'e, (san zej nbage'e ẕia to chi'ize), 
na' Dios gone' ga gawgak benne' chie' ka' ẕoa' stribe cháwe'ḻe'e, na' gone' ga yéljgekle' da' ẕix̱ che bez. 
