﻿SALMOS.
83.
Dios, bi so' žize. Bi so' žize, Dios, na' bi wsejw žo'o. 
Ẕbéžeya'agak benne' ka' bi ẕḻé'egekle' Le' chawe', na' ẕka'n ẕen kwingak benne' ka' ẕží'igake' chio'. 
Bagáche'ze ba béngake' toze diža' bi da' góngake' chegak benne' chio' ka', na' da' góngake' chegak benne' ka' žape chi'ikzo'. 
Wnnágake': “Le cho'o, wžía yi'žo benne' ka' nich biž soa yež chégake', na' biž soa no benne' chejsá' ḻaže'e che yež Israel.” 
Ba béngake' toze diža' bi da' góngake' chio' Le'. Nákgake' toze ḻo da' žénegekle' góngake'. 
Ki žongak benne' Edom ka', na' benne' Ismael ka', na' benne' Moab ka', na' ẕa'só Agar ka', 
na' benne' Jebal ka', na' benne' Amón ka', na' benne' Amalek ka', na' benne' Filistea ka', na' benne' yež Tiro ka'. 
Ḻezka' benne' Asiria ka' zej nake' toze ḻen ḻégake'. Yógo'te benne' ki žónḻengake' tẕen ẕa'só Lot ka'. 
Ben chegak benne' ki kan beno' chegak benne' Madián, na' kan beno' che Sísara, na' kan beno' che Jabín žoa'a yegw Sisón, 
benne' ka' beto' Le' ḻo yežlyó Endor, na' beyákgake' ka x̱che'e beže dan' žonen beb ḻo yo. 
Ben ga gak chegak benne' blo ka' chegak benne' ki kan gok che Oreb, na' che Seb, na' ben ga gak chegak benne' ka' ẕnna biá'gake' benne' ki kan gok che Seba, na' che Salmuna, 
dan' wnnagak benne' ki: “Gak chežo yežlyó gan zej nnita' benne' ka' che Dios.” 
Dios chia', ben ga gákgake' ka laga' biž da' ẕche' to be' da' žechjlen. Ben ga gákgake' ka beb da' ẕche' be' bdone'. 
Ka žon to yi' da' ẕzeyen to ya'a ẕen, na' ka žon yi' da' ẕzeyen to ḻo win biž, 
ka'kze wẕía ḻaže' benne' ki to ḻo be' bdone', na' bchebe ḻégake' ḻen to da' ẕen da' gono'. 
Ben ga yedoé'eḻe'egekle', nich gápegake' Le' ba la'ne, X̱anto' Dios. 
Ben ga chíx̱gekle', na' kwe' zédgekle' to chi'ize. Ben ga gá'ngake' ka'ze, na' gátgake'. 
Ben ga yeyónbia'gake' nako' Le' X̱anto' Dios. Tozo' Le' nako' Dios ẕente ḻawle dot yežlyó. 
