﻿SALMOS.
84.
Nží'iḻe'ela' yodo' chio' Le', Dios. Le' napkzo' dot yeḻa' wak. 
Ẕdan ḻaža'a soa' ḻo yodo' chio', X̱ana' Dios, na' žak ḻáže'ḻi'a soa' ga na'. Ḻen dot da' naka', na' dot ḻaža'a žoḻa' chio' Le', Dios ban. 
Ba bengak byinne ka' x̱ó'ngakba', na' gogoldo' ka' zej de latje gan žẕíagakba' bia že'ndo' chégakba' ka', dan' naken gan zoa žoa'a bkog la'y chio' Le', Dios. Le' napkzo' dot yeḻa' wak. Ẕnna bia'kzo' Le' neda', na' nako' Dios chia'. 
Ba nez ẕen naken chegak benne' ka' nníta'gake' ḻo yodo' chio'. To chi'ize wká'n ẕéngake' Le'. 
Ba nez ẕen naken chegak benne' ka', Le' ẕzoa chocho' ḻégake', benne' ka' ẕdan ḻáže'gake' chjake' ḻo ya'a la'y chio', Ya'a Sión. 
Kate' ẕdágake' lache' biž dan' nzin' Lache' Nis Ẕbéžežo, žóngake' ga žeyaken to latje gan žaḻ nis zil, na' yeschá' nis yejw latje nisen'. 
Žákgakže' benne' waḻe x̱ak zej yoe'e nez ga na' dan' ḻé'egekle' Dios ḻaw ya'a la'y chie', Ya'a Sión. 
Benle, X̱ana' Dios, da' ẕnnabla' ḻawo' Le'. Le' napkzo' dot yeḻa' wak. Benle cheto', Dios. Nako' Dios che Jakob. 
Ben chawe' benne' wnná bia' cheto', Dios, benne' wnná bian' wžío' Le'. 
Gakže chawe' soa' to žaze ḻo yodo' chio' ka soa' to mil yiz ga yoble. Žak ḻáže'ža' soa' gan žó'ogake' yodo' che Dios chia' ka to benne' ndo'w, ka soakza' to liža' da' zaka' gan bi zoa Dios. 
X̱anžo Dios žape chi'ikze' žo'o, na' žon choche' žo'o. Nži'ile' žo'o, na' žon chawe'e žo'o. Žape' benne' ka' ba la'ne, na' nži'ile' ḻégake', benne' ka' zej nake' dot ḻi ḻaže'. 
Dios, napo' dot yeḻa' wak. Ba nez ẕen naken chegak benne' ka' žx̱en ḻáže'gake' Le'. 
