﻿SALMOS.
85.
Ben chawo'o benne' chio' ka', X̱ana' Dios. Besló' ẕa'só Jakob ka' ḻo na'gak benne' zi'to' ka'. 
Benít ḻawo'o da' ẕinnj da' bengak benne' chio' ka'. Bdio' cheḻa'ale doḻa' chégake'. 
Bzoa žio' yeḻa' ẕža'a chio', na' bsano' yeḻa' yichj ža'a chio'. 
Ben ga yeyák cheto' yeḻa' ba nez che yeḻa' weslá chio' na' biž žo'o neto', Dios. 
¿To chi'ize žo'o neto'? ¿Žá'akzo' to kwe' to kwe' ẕa'sóto' ka'? 
¿Biž gono' ga yebelto' da' yoble, nich gaken cheto' yeḻa' ba nez ḻawo' Le'? 
X̱anto' Dios, beyache' ḻaže'l neto', na' beslá neto'. 
Wzé naga' da' nna X̱ana' Dios. Nne' da' gonen ga ga'ngak chawe' benách chie' ka' nich biž gongak benne' la'y chie' ka' da' yaḻze. 
Da' likze Dios zóateze' yeslé' benne' ka' žápegake' Ḻe' ba la'ne, na' ḻa' ḻaw yeḻa' ẕen chie' ḻo yežlyó chežo. 
Zej nžag yeḻa' žeyache' ḻaže', na' da' li che Dios. Nakgak toze da' chawe', na' yeḻa' ẕga'n chawe' chie'. 
Da' nak dot da' li chie' yeschán' yežlyó nga, na' seḻe'e da' chawe' chie' da' zan' ya'abá. 
X̱anžo Dios žseḻe'e nis yejw chežo, na' yežlyó chežo gonnḻe'en linne. 
Da' naken chawe' žejlen Dios, na' wḻoe'elen nez da' chéjḻenžo. 
