﻿SALMOS.
86.
X̱ana' Dios, bze nag, na' benle chia', dan' ẕzaka'a neda', na' žiážjela'. 
Bwia neda' dan' naka' chio'. Dios chia', beslá neda', wen žin chio', dan' žx̱en ḻaža'a Le'. 
X̱ana' Dios, beyache' ḻaže'l neda', dan' žḻiža' Le' dot ža, dot yele. 
Ben ga yebéḻe'ela' neda', wen žin chio', dan' ẕzoa kwina' ḻo no'o Le', X̱ana' Dios. 
Nako' Le' chawe', X̱ana' Dios, na' ženít ḻawo'o neto', na' žeyache' ḻáže'tezlo' benne' ka' žḻížgake' Le'. 
X̱ana' Dios, benle da' ẕcháḻjḻena' Le', na' bze nag da' ẕnnabla' Le'. 
Ḻo ža kwe' zedḻa' wḻižkza' Le', dan' žechébekzo' Le' chia'. 
X̱anto' Dios, bi zoa no benne' nake' dios ka nako' Le' na' bi zoa no benne' gak gone' ka nak da' žono' Le'. 
Beno' Le' benne' ka' nníta'gake' yógo'te yež ka'. Ḻá'gake', na' wká'n ẕéngake' Le', X̱anto' Dios, na' wká'n ẕéngake' La la'y chio', 
dan' nako' ẕen, na' žono' da' žonen ga žebanlto'. Tozo' Le' nako' Dios. 
Bsedle neda' da' žak ḻažo'o gona', X̱ana' Dios, na' gona' da' naken dot da' li chio'. Bchi'le ḻáẕda'wa' nich žeba' La la'y chekzo' Le'. 
Dot ḻaža'a wká'n ẕenkza' Le', X̱ana' Dios, na' wká'n ẕenkza' La la'y chekzo' Le' to chi'ize, 
dan' žeyache' ḻáže'tezlo' neda', na' besló' be' da' nakkza' ḻo yi' gabíl. 
X̱ana' Dios, benne' ka' ẕka'n ẕen kwíngake' ẕdíḻ-ḻengake' neda'. Zej nake' benne' yichj ža'a ka', na' žénegekle' gótgake' neda', na' bi ẕžébegake' Le', 
san Le', X̱ana' Dios, žeyache' ḻáže'lo' neto'. Nako' ẕen ḻaže', na' bi ẕžo'o to chi'ize, san žeyache' ḻáže'tezlo' neto', na' nako' dot ḻi ḻaže'. 
Bwia kan žak chia', na' beyache' ḻaže'l neda'. Benn neda' yeḻa' wak chio', neda' wen žin chio', na' wdape chi'i neda', ẕi'n no'le wen žin chio'. 
Bḻoe'el neda' to da' gak bian' gak chawe' chia', na' ben ga benne' ka' bi ẕḻé'egekle' neda' chawe' ḻé'egeklen', na' yedoé'egekle', dan' Le', X̱ana' Dios, gókḻenkzo' neda', na' beyón ẕeno' neda'. 
