﻿SALMOS.
87.
Len yež Sión žian ḻaw ya'a la'y. 
Nží'ižele X̱anžo Dios latje gan ẕchi'a ḻáže'gak benne' ka' nníta'gake' yež Sión, ka nži'ile' yógo'te liž ẕa'só Jakob ka'. 
X̱tanḻe'e nak da' ẕnna Dios kan nak yež chien'. 
Ẕnne': “Chejsá' ḻaža'a zej nnita' benne' ka' zej nónbi'e neda' ḻo yežlyó Egipto, na' ḻo yež Babilonia. Le wia nga, ḻo yežlyó Filistea, na' ḻo yež Tiro, na' ḻo yežlyó Etiopía, goljgak benne' ki zej nake' chia' neda'.” 
Ka nak che yež Sión ẕnne': “Benne' ni, na' bennen' góljgake' ga na', na' neda', Dios ẕente, wzóa chocha' yežen'.” 
Kate' wláb X̱anžo Dios benne' ka' zej nake' chie', nnakze' Ḻe': “Benne' ni golje' ḻo yežen'.” 
Benne' ka' žóḻgake', na' benne' ka' ẕyá'agake', nnágake': “Dot da' napa' zan' ḻo yežen'.” 
