﻿SALMOS.
88.
X̱ana' Dios, Le' žeslakzo' neda'. Dot ža dot yel žḻiža' Le'. 
Benle da' ẕchaḻja' ḻawo' Le', na' bze nag da' žḻiža' Le'. 
Žedó ḻaža'a ḻo da' bi nak chawe' da' žaken chia', na' ba zoa' gata'. 
Ẕḻé'egekle benne' ka' neda' ka to benne' gat, dan' žatḻe'e ni'a na'a. 
Nga'na' ka'ze ladjw benne' gat ka'. Naka' ka benne' ka' gótgake' ḻo wdiḻe, na' zej die' ḻo yežw ba ka', benne' ka' biž žezá' ḻažo'o, Dios, chégake', na' biž zej yoe'e ḻo no'o Le'. 
Žak chia' ka bzoakzo' neda' to ḻo yežw gže', gan nak choḻ, na' nakḻe'en gže'. 
Žekla' ẕžá'aḻi'o neda'. Da' žak chia' naken kan žetja' ẕan nisdo' dan' ẕgo'nḻe'en. 
Beno' ga bebíga'gak lježa' ka' gan zoa'. Beno' neda' ka to da' žesgotlen benne' ka'. Naken chia' ka nyejwa' liž ya, na' bi gak yežoja'. 
Ẕchoḻ yej ḻawa' ni'a che da' ẕzáka'ḻi'a. Yógo'te ža žḻiža' Le', X̱ana' Dios. Ẕchis na'a ḻawo' Le'. 
¿Ḻen yeḻa' wak che ya'abá gákḻeno' benne' gat ka'? ¿Že'gak benne' gat ka' Le': “Žóx̱keno'”? 
¿Ẕchaḻjgak benne' ka' zej ngache'e yežw ba che yeḻa' ži'i ḻaže' chio'? ¿Ẕchaḻjgak benne' ka' zej yoe'e latje choḻ chegak benne' gat ka' che da' ḻi ḻaže' chio'? 
¿Yeyónbia'gak benne' ka' zej yoe'e latje choḻen' ka nak da' ẕente da' žono'? ¿Yeyónbia'gak benne' zej yoe'e gan bi zoa no benne' žesá' ḻaže'e nakkzo' chawe'? 
San neda' žḻiža' Le', X̱ana' Dios. Yógo'te zile da' ẕnnabla' Le' ženlen ḻawo' Le'. 
¿Biẕ chen' žebéj yichjo' neda', X̱ana' Dios? ¿Biẕ chen' bi ẕwio' neda' nich gákḻeno' neda'? 
Ẕzáka'ḻi'a, na' ba zoa' gata'. Kate' ne naktia' bi' kwide' ẕzáka'ḻi'a dan' bsako'o Le' neda', na' žedó ḻaža'a. 
Žekla' ẕžá'aḻi'o neda'. Da' ẕchebo' neda' benen ga bedó ḻaža'a. 
Zej nyechjle da' ki neda' dot ža. Žsáka'gaken neda' gáte'teze. 
Beno' ga bebíga'gak lježa' ka' gan zoa', na' toze da' nak choḻ zóaḻenen neda'. 
