﻿SALMOS.
89.
X̱ana' Dios, góḻteza' che yeḻa' ži'i ḻaže' chio'. Wzenla' to kwe' to kwe' ẕa'sóto' ka' nako' ḻi ḻaže'. 
Nnezla' sóateze yeḻa' ži'i ḻaže' chio', na' to chi'ize zoa yeḻa' ḻi ḻaže' chio', kan zoakze ya'abá. 
Le' wnnó': “Bena' to diža' ḻen bennen' wžía'. Bchebe ḻaža'a da' gona' che Dabí, wen žin chia'. 
Goža'-ne': gona' ga sóatezegak ẕa'só' ka', na' gona' ga nna biá'tezgakbe' ḻo wlazo' le'.” 
Benne' ka' nníta'gake' ya'abá žoe ḻáwgake' Le' ni'a che da' ẕente da' žono', na' ni'a che yeḻa' ḻi ḻaže' chio', X̱ana' Dios. 
Bi zoa no benne' ya'abá, bennen' nake' ka nakkzo' Le', X̱ana' Dios. Bi zoa no benne' nake' benne' ẕente ka nako' Le'. 
Benne' ka' zej nnite'e ya'abá žápegake' Dios ba la'ne na' yógo'te benne' chie' ka' ẕžébegake' Ḻe'. 
X̱anto' Dios, ẕnna bi'o benne' zante, benne' žjake' ḻo wdiḻe, nníta'gake' ya'abá. Bi zoa no benne' nake' ka nako' Le', X̱ana' Dios. Nako' Benne' wáḻeḻe'e, na' nakkzo' ḻi ḻaže'. 
Ẕnna bi'o nisdo' dan' ẕgo'nen. Kate' ẕgo'nḻe'en Le' ẕbek žion'. 
Blej bchochjo' benne' Egipto ka', na' bgá'ngake' ka to da' gat. Besḻaso' benne' ka' bi ẕḻé'egekle' Le' chawe' ḻen no'o wáḻeḻe'e. 
Chio' Le' nak ya'abá, na' chio' Le' nak yežlyó. Beno' yežlyó nga, na' da' ka' nníta'gaken ḻawlen. 
Beno' da' de cheḻá'a gan za' be' zag, na' da' de cheḻá'a gan ẕde wbíž byo' zag ka'. Ḻo yeḻa' žebele žoḻgak Ya'a Tabor, na' Ya'a Hermón chio' Le'. 
Benne' wáḻeḻe'e nako' Le', na' ẕenḻe'e nak yeḻa' wak chio'. 
Ḻo da' chawe', na' ḻo da' ḻi ḻaže' ẕnna bi'o. Ḻo yeḻa' ži'i ḻaže' na' ḻo da' ḻi ḻaže' žono' yógo'te. 
Ba nez ẕen naken chegak benne' ka' žóḻgake' da' žoe ḻáwgake' Le', na' zej zoe' ḻo yeḻa' baní' chio', X̱ana' Dios. 
Ni'a chio' Le' žebéḻe'egekle' dot ža, na' želyenle' x̱tižo'o Le' dan' nako' chawe'. 
Nakkzo' Le' yeḻa' waḻe chegak benne' ka', na' ḻezka' yeḻa' x̱tan chégake'. Žono' neto' wáḻeže dan' naken da' žénekzlo' gono'. 
X̱anžo Dios žape chi'e žo'o, na' Dios la'y chegak benne' Israel ka' ẕchi'le' žo'o. 
Ža ni'te bchaḻjo' da' bḻoe'elo' benne' chawe' ka', benne' wen žin chio' ka', na' wnnó': “Ba wžía' to benne' waḻe ladjw benne' chia' ka'. Bena' ga ẕnna bi'e, na' žákḻena' ḻe'. 
Wžía' Dabí, benne' wen žin chia'. Bzoakza' ḻe' nich gake' benne' wnná bia'. 
Neda' gákḻenteza' ḻe'. Ḻen yeḻa' wak chia' gon chocha' ḻe'. 
Benne' ka' bi ẕḻé'egekle' ḻe' chawe' bi gak bi da' góngake' chie', na' benne' wen da' ẕinnj ka' bi gak góngake' ḻe' ẕia. 
Wléj wchochjkza' benne' ka' bi ẕḻé'egekle' ḻe' chawe', na' wkwasa' benne' ka' ḻawe' ḻe'. Wžía yi'a benne' ka' ẕží'igake' chie' ḻe'. 
Ží'itezla' ḻe', na' gaka' ḻi ḻaže' ḻen ḻe', na' ni'a chia' neda' golže yeḻa' wnná bia' chie'. 
Gona' ga nna bi'e do ẕente žoa'a nisdo', na' do ẕente žoa'a yegw Éufrates. 
Ḻe' yi'e neda': Le' nako' X̱a'. Nako' Dios chia'. Žape chi'o neda', na' žesló' neda'. 
Neda' wzóa' ḻe' ka ẕi'na' blo, na' nna bi'e yógo'te benne' wnná bia' ka' dot yežlyó. 
Ží'itezla' ḻe', na' sóateze diža' da' bénḻena' ḻe'. 
Gona' ga sóatezegak ẕa'sóe' ka', na' nna biá'gake' ḻo wlaze' ḻe' x̱ak zoa ya'abá. 
Cha' wsangak ẕa'só Dabí ka' da' bchi'la' ḻe'e, na' cha' bi góngake' ka nak da' goža' ḻégake', 
na' cha' wzóagake' cheḻa'ale da' bsedla' ḻégake', na' cha' bi góngake' kan ẕnnakza' neda', 
na' wsaka' zi'a ḻégake' dan' ẕží'igake' chia' neda', na' chinnja' ḻégake' yid dan' žóngake' da' ẕinnj, 
san bi wsana' kan nži'ila' Dabí, na' bi wsana' gak ḻi ḻaža'a ḻen ḻe', 
na' bi gaḻ ḻaža'a diža' da' bénḻena' ḻe', na' bi wchá'a da' ba wnnía'. 
To chi'ize bzetj kwina', bchebe ḻaža'a bi da' gona', na' batkle gon ḻaža'a che Dabí. 
Wnnía': Sóatezegak ẕa'sóe' ka', na' nna biá'gake' ḻo wlaze' ḻe' ḻawa' neda' x̱ak zoa wbíž. 
Yeḻa' wnná bia' chie' sóatezen choch x̱ak zoa byo' ya'abá. Sóatezen choch x̱ak zoa ya'abá.” 
Le', Dios, wléj yichjo', na' bzo' cheḻa'ale bennen' wžío', na' ẕžá'aḻi'o ḻe'. 
Bzo' cheḻa'ale diža' dan' bénḻeno' Dabí, benne' wen žin chion', na' bka'no' ka'ze yeḻa' wnná bia' chie'. 
Bchinnjo' ze'e da' wdape chi'in yež ẕen chien', na' bchinnjo' yógo'te yo'o waḻe, da' ka' wdape chí'igaken yežen' ḻo wdiḻe. 
Yógo'te benne' ka' ẕdégakze' ga na' ẕbángake' da' ka' gota' chie', na' benne' yež gawze ka' žon dítjgekle' ḻe'. 
Beno' ga bzéx̱jwgak benne' ka' ḻe', benne' ka' bi ẕḻé'egekle' ḻe' chawe', na' žebéḻe'egekle'. 
Bchinnjo' da' ka' ẕkonle' žin ḻo wdiḻe, na' bi gókḻeno' ḻe' ḻo wdiḻen'. 
Bekó'o yeḻa' ẕen chie', na' bka'no' ka'ze yeḻa' wnná bia' chie'. 
Beno' ga nake' ka to benne' gole kate' ne zoe' yiz kwide' chie', na' beno' ga žedoe'ele'. 
X̱anto' Dios, ¿to chi'ize bi yenlo' cheto'? ¿To chi'ize ẕža'akzo' neto'? 
Bejsá' ḻaže' soa' yežlyó nga to chí'ido'ze. Beno' ga zoagak nbangak yógo'te benne' to chí'ido'ze. 
Nitó benne' bi soe' nbane' to chi'ize. Yógo'tie' gátgake'. Nitó benne' bi yelé' ḻo na' yeḻa' got. 
X̱anto' Dios, ¿biž nži'ilo' Dabí kan bchebe ḻažo'o, na' wnnakzo' gono'? 
Bwia nga, X̱anto' Dios, ka yógo'te benách ẕka'ngak benne' wen žin chion' ka'ze, na' nbaga'a neda' da' žon dítjgekle benne' wláž chia' ka'. 
Benne' ka' bi ẕḻé'egekle' Le' chawe' žon dítjgekle' bennen' wžío' Le', X̱anto' Dios. Žon dítjgekle' ḻe' gáte'teze zeje'. 
¡Ga'n ẕen X̱anžo Dios to chi'ize! Ka' naken, na' ka' gaken. 
