﻿SALMOS.
90.
X̱anto' Dios, to chi'ize nakkzo' Le' to gan že' cháwe'to'. 
Ža ni'te kate' bi na' gono' ya'a ẕen ka', na' bi na' soa yežlyó nga, ža ni'te, na' zejte ža se ḻawte ža nakkzo' Le' Dios. 
Žono' ga žeyakgak benne' ka' da' gókgake', kate' ži'o ḻégake': “Le yeyák bix̱te yo.” 
Chio' Le' to mil yiz zej naken ka neje, žan' da' ba wdén, na' ka to chí'ido'ze gachje yele. 
Ka' gaze ẕkwaso' benne' ka' ka žon to nis wbá'a. Zej nake' ka to bichgale dan' ẕnnitlen kate' žebanžo. 
Zej nake' ka to yeje yix̱e' da' žaljen zildo', na' kate' ẕḻa' wbíž, na' ẕbižen. 
Ẕbia yi'to' dan' ẕžo'o neto'. Že' zedlto' dan' ẕžá'ḻi'o neto'. 
Ẕḻe'elo' yógo'te da' bi nak chawe' da' žonto'. Ẕḻoe'elo' ḻaw ẕia da' nbága'to'. 
Ẕzacho'o yiz cheto' dan' ẕžo'o neto'. Žeyožgak yiz cheto' ka to be' da' ẕka'to'. 
Ka zej nak ža zoato' nbanto', zej nakzen chonnlalj chi yiz, na' cha' nakto' benne' waḻe, wak soato' nbanto' taplalj yiz, san ka zej nak yiz ka', ẕzáka'to', na' že' zedlto'. Ka' gaze ẕdegak yiz ka', na' ẕnitlto'. 
¿Noẕ benne' nnezle' binlo ka nak yeḻa' ẕža'a chio'? ¿Noẕ benne' nnezle' ka nak yeḻa' yichj ža'a chio'? 
Bsedle neto' wkonlto' binlo žin ža cheto' ka', nich gak chejni'ilto' cháwe'do'. 
X̱anto' Dios, beyón neto' toze ḻen Le'. ¿To chi'ize želo'? Beyache' ḻaže'l neto', benne' wen žin chio' ka'. 
To to zil bzoa yichj ḻáẕdo'to' yeḻa' ži'i ḻaže' chio', na' ḻo yeḻa' žebele góḻtezto' chio' yógo'te ža soato' nbanto'. 
Benn cheto' yiz zan nich yebelto' ka zej nak yiz bsáka'ḻi'o neto', na' ka zej nak yiz wžé' zedlto'. 
Be' neto', benne' wen žin chio' ka', latje ḻe'elto' da' ẕen da' žono', na' ḻé'egekle ẕa'sóto' ka' yeḻa' ẕen chio'. 
X̱anto' Dios, ben chawe' neto'. Ben chawe' žin da' žonto'. ¡O', X̱anto' Dios, ben chawe' žin da' žonto'! 
