﻿SALMOS.
91.
Bennen' žx̱en ḻaže'e X̱anžo Dios nich gape chi'e ḻe', na' ẕzi'e Dios, Bennen' nape' dot yeḻa' wak, nich gákḻene' ḻe', 
wak yi'e Dios: “Le'kze žx̱en ḻaža'a, na' Le' ẕkache' chawo'o neda'. Nako' Dios chia', na' žx̱en ḻaža'a Le'.” 
Ḻe' wkache' chawe'e le' ḻo da' ẕia da' bi nḻa' ḻawn, na' ḻo yižwé' da' žoten benne' ka'. 
Wkache' chawe'e le' ka žon to ẕkoko', bian' žape chi'iba' bríse'do' ka' ẕan x̱ilba', na' cho'o chawo'o ḻo ne'e Ḻe'. Yeḻa' ḻi ḻaže' chie' gon chi'in le', na' wkache' chawen' le'. 
Bi be gak wchebe le' žel, na' bi be gon le' da' ẕia te ža, 
na' to yižwé' che da' choḻ bi be gonen chio' le', na' to da' ẕinnj da' žoten benne' ka' te ža, bi be gonen chio'. 
Wak gatgak to mil benne' ka' kwito' le', na' chi mil benne' ka' gawze gan zo', san bi be sako'o le'. 
Wio', na' ḻe'elo' da' ẕia da' gaken chegak benne' wen da' ẕinnj ka'. 
Wẕi'o X̱anžo Dios, na' žx̱en ḻažo'o Ḻe', na' Dios, Bennen' nape' dot yeḻa' wak, wkache' chawe'e le'. 
Che ḻen bi be da' ẕia gak bi da' gonen chio', na' bi cho'o nitó yižwé' ližo'. 
Dios seḻe'e wbás che ya'abá chie' ka' nich gákḻengake' le', na' gape chí'igake' le' gáte'teze gan chejo'. 
Góx̱wgake' le' ḻo ná'gake' nich bi gon to yej ni'o we'. 
Wlejkzo' bež yix̱e' ka', na' beḻe ka', bež yix̱e' sníaḻe'e ka', na' bia snia ka'. 
Ẕnna Dios: “Yeslá' yógo'te benne' ka' zej nži'ile' neda', na' wkache' chawa'a benne' ka' žechébgake' naka' X̱ángake'. 
Kate' wḻížgake' neda', na' yecheba' chégake'. Kate' že' zédgekle', sóaḻenkza' ḻégake'. Yeslá' ḻégake', na' gapa' ḻégake' ba la'ne. 
Gona' ga sóagake' nbángake' yiz zante, na' yeslá' ḻégake'.” 
