﻿SALMOS.
92.
X̱anto' Dios, da' x̱tanḻe'e žoe ḻawto' Le', na' žoḻto' da' ẕka'n ẕenen Le', Dios ẕente. 
Nakḻe'e x̱tan ẕzenlto' benne' ka' zil-le kan žeyache' ḻáže'lo' neto', na' žel ẕḻoe'elto' nako' ḻi ḻaže'. 
Žoḻto' chegak da' ki, na' ẕchinnto' da' žóḻ-ḻento' dan' nwan' chi do, na' ẕgoḻto' da' ẕnneḻe'en x̱tando'. 
X̱ana' Dios, ni'a che da' žono' Le' žebéḻe'ela'. Ni'a che da' ben no'o nak chia' yeḻa' ba nez. 
Ẕenḻe'e nak da' beno', X̱ana' Dios, na' ẕenḻe'e nak da' ẕgo'o ḻo yichj ḻáẕda'wa' gona'. 
Batkle chejní'igekle benne' ḻaẕdo' zide ka', na' bi gak nnézgekle benne' nat ḻaže' ka' da' ni. 
Kate' ẕgólegak benne' ka' ẕbej yíchjgake' Dios kan ẕgole yix̱e', na' žežój chawe' da' žongak benne' wen da' ẕinnj ka', naken nich kwia yí'gake' to chi'ize. 
Le', X̱ana' Dios, nakkzo' Dios ẕente. 
Nak bia' da' gak chegak benne' ka' ẕží'igake' chio' Ḻe', X̱ana' Dios. Nak bia' kwia yi'gak benne' ka' bi ẕḻé'egekle' Le' chawe'. Wẕonnjgak yógo'te benne' wen da' ẕinnj ka'. 
Le' žono' ga nakža' neda' waḻe kan nak to beže. Ẕgo'o set yichja' da' žon chochen yichj ḻáẕda'wa'. 
Da' likze ḻe'ela' benne' ka' bi ẕḻé'egekle' neda' chawe' wzóa ẕíbgake' ḻawa' neda', na' yenla' kwež nyáche'gak benne' ka' bdíḻ-ḻengake' neda', benne' wen da' ẕinnj ka'. 
Changak benne' chawe' ka' ka žongak yag zina' ka'. Gólegake' kan ẕgólegak yag sedro ka' ḻaw Ya'a Líbano. 
Zej nake' ka to yag da' zen ḻo ḻi'a yodo' che X̱anžo Dios, dan' ẕgóleḻe'en ḻo ḻi'a liž Dios chežo. 
Zej nake' ka yag ka' ẕbíagaken kate' ngóleḻe'egaken na' ne zej naken yag ya'a waḻe ka'. 
Benne' ki wzéngekle' benách ka' nak X̱ana' Dios ḻi ḻaže', na' Bennen' žon choche' neda', na' bi be zoaḻen Le' da' bi naken chawe'. 
