﻿SALMOS.
94.
X̱ana' Dios, Le' žezi'kzo' wzón benne' ka'. Le' žebéj yichjo' benne' wen da' ẕinnj ka'. 
Ẕchi'a ḻažo'o Le' da' žongak yógo'te benne' ka'. Wzó ža', bsaka' benne' ka' kan žaḻa' gak chégake', benne' ka' ẕka'n ẕen kwíngake'. 
X̱ana' Dios, ¿to chi'ize gongak benne' wen da' ẕinnj ka' ki? ¿To chi'ize yebégekle benne' ẕbej yíchjgake' Le'? 
¿To chi'ize wká'n ẕen kwíngake', na' nne zí'gake'? ¿To chi'ize wká'n ẕen kwingak benne' ka' žebéj yíchjgake' Le'? 
Benne' ki ẕžia yí'gake' benne' chio' ka', X̱ana' Dios na' žsaka' zí'gake' benne' ka' wžekzo' Le'. 
Žótgake' no'le wzebe ka', na' benne' zi'to' ka', na' žóngake' ga gatgak bi' wzebe ka'. 
Ẕnnágake': “Bi be ẕḻe'el Dios, X̱angak benne' ka', dan' Dios chegak benne' Israel ka' bi ži'e wnné yoe chégake'.” 
Le chejní'il, ḻe'e, benne' ḻaẕdo' zide ka', ḻe'e, benne' nat ḻaže' ka'. ¿To chi'ize bi chejní'ilele? 
Dios bene' nagžo. ¿Bi ženle' da' ẕnnale? Dios bene' yej ḻawžo. ¿Bi ẕḻe'ele' da' žonle? 
Dios žsaka' zi'kze' benne' yež ka'. ¿Bi tiḻe' ḻe'e? Dios nake' Bennen' ẕzejni'ile' benách ka'. ¿Bi gákbe'ele' da' yo'o yichj ḻáẕdo'le? 
X̱anžo Dios nnezkzle' da' yo'o yichj ḻáẕdo'gak yógo'te benách. Nnezle' zej naken da' yaḻze. 
X̱ana' Dios, ba nez ẕen naken che bennen' ẕzejni'ilo' Le', na' žsedlo' ḻe' ka nak da' bchi'lo' neto'. 
Ga'n bennen' chawe' kate' za' ža gak bi da' sake'e, na' ža na' gáche'gak benne' wen da' ẕinnj ka' yežw ba. 
Batkle kwej yichj X̱anžo Dios benne' chie' ka', na' bi wsán ḻaže'e benne' ka' ba wžekze' Ḻe', 
san gone' ga wchi'a ḻáže'gak benne' ka' ḻo da' naken chawe', na' yógo'te benne' ḻi ḻaže' ka' si' ḻo ná'gaken'. 
¿Noẕkze benne' gákḻene' neda' nich tíḻ-ḻenžo benne' wen da' ẕinnj ka'? ¿Noẕkze benne' gónḻene' neda' tẕen nich wžía yi'žo benne' wen da' ẕinnj ka'? 
Chela' bi gokḻen X̱anžon' neda', ba bejgacha'a yežw ba. 
Kate' wnnía': zoa' chejchégoa'a, na' Le', X̱ana' Dios, ḻo yeḻa' ži'i ḻaže' chio' gókḻeno' neda'. 
Kate' ži'a wnné yoe, na' že' zedla', žeyón ẕenkzo' neda', na' žono' ga žebéḻe'ela'. 
Batkle gako' toze ḻen benne' ka' ẕchi'a ḻáže'gake' benách ka' ḻo da' bi nak chawe', benne' ka' ẕzóagake' cheḻa'ale da' naken chawe', na' da' bchi'lo' Le' neto'. 
Benne' ki žóngake' toze diža' bi da' góngake' che no benne' nake' chawe', na' ẕchóggake' chie' gate', na' bi be ẕia nbage'e, 
san X̱anžo Dios nake' ka to yo'o gan zoa chawa'a. Dios chia' nake' ka to yej x̱e da' žon chochen neda'. 
Ḻe' yebi'e chegak benne' wen da' ẕinnj ka' ka nakkze da' ẕinnj da' béngake'. Wžía yi'e benne' ka' ni'a che da' bi nak chawe' da' žóngake'. X̱anžo Dios wžía yi'e benne' wen da' ẕinnj ka'. 
