﻿SALMOS.
95.
Le da ḻe'e, wká'n ẕenžo X̱anžo Dios. Ḻen yeḻa' žebele goḻžo che Bennen' ẕzoa choche' žo'o nich yelažo. 
Chejžo ḻawe' Ḻe', na' ye'žo-ne': “Žóx̱keno'.” Ḻen yeḻa' žebele goḻžo da' we ḻawžo Ḻe'. 
X̱anžon' nake' Dios ẕente, na' nake' Benne' wnná bia' ẕénḻe'eže ka dios ka' chegak benách ka'. 
Ẕnna bi'e dot yežlyó nga, gan nak gže', na' gan nak sibe ḻaw ya'a ka'. 
Ẕnna bi'e nisdo', da' benkze' Ḻe', na' ḻezka' yežlyó nga da' bene' Ḻe'. 
Le da, wká'n ẕenžo-ne', na' wzóa ẕibžo ḻawe'. Wzóa ẕibžo ḻaw X̱anžon', Bennen' bene' žo'o. 
Ḻe' nake' Dios chežo, na' nakžo chie' Ḻe'. Nakžo benne' ka' žape chi'ikze', na' nakžo ka ẕíla'do' chie' ka'. 
Ẕnna X̱anžon': “Cha' žénlele chi'a na'a ža, bi gonle zide ḻáẕdo'le kan bengak x̱a x̱to'le ka' gan nzin' Meriba, na' kan béngake' ḻo ža na' ḻe'e latje dach gan nzin' Masah, 
gan bcha'agak x̱a x̱to'le ka' neda', na' béngake' ga bža'a neda' ḻa'kze bḻé'egekle' yógo'te da' ẕen ka' da' bena'. 
Choplalj yiz bzoela' benne' ka', na' wnnía': zej nake' benne' žebéj yíchjgake' neda', na' bi žóngake' kan bchi'la' ḻégake'. 
Che ḻen, ḻo yeḻa' ẕža'a chia' ben chocha' x̱tiža'a, na' wnnía': bi chó'ogake' gan yezí' ḻáže'gake' tẕen ḻen neda'.” 
