﻿SALMOS.
96.
Le goḻ che X̱anžo to da' kob. Le goḻ che X̱anžon', ḻe'e zoale do ẕente yežlyó. 
Le goḻ che X̱anžon', na' le wká'n ẕen La la'y chie'. Tža tža le wzenle benách ka' kan žeslé' žo'o. 
Le wzenle benne' zi'to' ka' ka nak yeḻa' ẕen chie', na' benne' yógo'te yež ka' kan nak da' ẕen da' bene'. 
Ẕente nak X̱anžon', na' žaḻa' wká'n ẕénḻe'ežo-ne'. Žaḻa' gapžo Ḻe' ba la'ne, na' kege dios ka' chegak benách ka'. 
Zej nakze yógo'te dios ka' lo'a ka', san X̱anžo Dios bene' ya'abá na'le. 
Nape' Ḻe' yeḻa' wak, na' yeḻa' wnná bia'. Nža' yodo' chie' yeḻa' ẕen, na' yeḻa' x̱tan. 
Le wká'n ẕen X̱anžon', ḻe'e zoale dot yežlyó nga. Le wká'n ẕen yeḻa' ẕen chien', na' yeḻa' wak chien'. 
Le gape ba la'ne X̱anžon' kan žaḻa' gonžo. Le yedjwá' da' wnéẕjwle na' le cho'o yodo' x̱tan chie'. 
Le wká'n ẕen X̱anžon' dan' nake' la'y, na' x̱tanḻe'e. Le žebe ḻawe' Ḻe', ḻe'e zoale dot yežlyó nga. 
Le ye' yež ka': “Nak X̱anžon' Benne' Wnná Bia' Ẕen. Bzoa choche' yežlyó nga, na' bi gak no benne' wtén'. Wchi'a ḻaže'e benne' ka' ḻo da' naken chawe'.” 
Le yebele, ḻe'e, zoale ya'abá, na' yežlyó nga. Le nne, ḻe'e, nisdo', na' bia ka' zoale ga na'. 
Le yebele, ḻe'e, yix̱e', na' bia ka' zoale ga na', na' ḻe'e, yag ka' zej zen ḻo ya'a ka'. Le nne zižje ḻo yeḻa' žebele chele, 
ḻaw X̱anžon' kate' yide'. Yide' nich wchi'a ḻaže'e benách ka' ḻo yežlyó nga. Nna bi'e benne' ka' do ẕente yežlyó. Nna bi'e ḻégake' ḻo da' naken chawe', na' ḻo da' naken dot da' li. 
